Qazaqstan musylmandary odaǵynyń basshysy Murat Telibekovtiń áıeli kúıeýiniń ony 10 jasar balasynyń kózinshe uryp-soqqanyn aıtty. Bul týraly jelide Telibekovtiń áıeli Ekaterına Chekanovanyń vıdeo úndeýi jarııalandy, dep habarlaıdy “Adyrna” ulttyq portaly.
Ekaterına Chekanovanyń aıtýynsha, birneshe jyldan beri erli-zaıyptylar arasynda urys-keris bolyp, arty janjalǵa ulasqan. Bir kún buryn olardyń arasynda qatty urys shyǵyp, Telibekov áıelin balanyń kózinshe uryp-soqqan. Musylmandar odaǵy prezıdentiniń áıeli dosyna telefon soǵyp, balany biraz ýaqytqa kelip alyp ketýdi ótingenin aıtty. Alaıda olar kelgende kúıeýi olarǵa da shabýyl jasapty.
Telibekovtiń ózi áleýmettik jelide jazba jazyp, kerisinshe áıeliniń dosyn ózine shabýyl jasady dep aıyptaǵan. Ol belgisiz bireýler onyń úıine basyp kirip, iri kólemdegi aqshany urlap, 10 jasar qyzyn urlamaq bolǵanyn aıtady.
"Buzaqylar balanyń kózinshe onyń ákesin uryp-soǵyp, balaǵattap, qorlaǵan. Boıjetken aýyr psıhologııalyq jaraqat aldy", - dep jazdy ol.
Al Ekaterına Chekanovanyń qurbysy Kım Elena Ekaterınanyń vıdeosyn jarııalap, Telibekovtiń jalǵan aqparat taratyp, jala jaýyp otyrǵanyn aıtady.
“13 tamyzda ol ony óltire jazdady! Chekanova Ekaterına (áıeli) sol kúni keshke maǵan telefon soǵyp, kómek surap, kúıeýi Telibekov Murattyń uryp-soqqanyn aıtty. Men ol kezde otbasymmen meıramhanada boldym. Jaqyn dosymnyń ómirinen qorqyp, onyń nómirine qaıta qońyraý shala bastadym, biraq ol kezde jaýap bermedi. Men onyń qaıda turatynyn bilip, anammen birge olardyń úıine bardym”, dep jazdy qurbysy.
Sondaı-aq, Elenanyń aıtýynsha, ol Ekaterınanyń úıine barǵanda terezeden aıqaılaǵan. Úıine kirip qurbysyn qutqarmaq bolǵanda Murat olardy da urypty.
“Ol meniń ishimnen uryp, anamdy birneshe ret urdy. Endi myna Telibekov Murat óziniń feısbýk paraqshasyna jala jaýyp, vıdeo jarııalap jatyr. Sol jerde áıelin zalym kúıeýinen qorǵaý úshin biz onymen tóbelesip qaldyq. Ol meni jáne anamdy onyń páterine zańsyz kirip, uryp-soǵyp, iri kólemdegi aqshany urlady dep aıyptaıdy. Onyń qyzyn urlap, úıinde ustaǵanymyzdy, oǵan psıhotroptyq zattardy toltyrǵanymyzdy aıtyp jala jabýda. Men júktiliktiń 8-shi aptasyndasyn. Ol jalǵan aıyp taǵyp jatqandyqtan, men únemi stresstemin”, dep jazǵan Elena.
”Adyrna” ulttyq portaly
