«Jer amanaty» komıssııasynyń «jedel jelisine» jer máseleleri boıynsha 985 ótinish kelip tústi. Onyń barlyǵy óńirlik komıssııalardyń qaraýyna berildi, dep habarlaıdy “Adyrna” ulttyq portaly.
«Búginde aýyl sharýashylyǵy maqsatyndaǵy jer tapshylyǵy máselesi ózekti problema bolyp otyr. Partııanyń mobıldi qoǵamdyq qabyldaýy el aralaǵan kezde óńir turǵyndary osy máselelerdi kóterdi. Bir aıda «Jer amanaty» komıssııasynyń «jedel jelisine» jer máseleleri boıynsha 985 ótinish kelip tústi. Kóbinese bul ótinishter jaıylym jer bólý máselesine – 62%, shalǵaıdaǵy jaıylymdar men jer ýchaskelerin alý kezinde kómek kórsetilýine – 28% qatysty boldy», – dedi «AMANAT» partııasy Respýblıkalyq qoǵamdyq qabyldaý bólmesiniń meńgerýshisi Álııa Sadyrbaeva.
7 shildede «Jer amanaty» komıssııasynyń jer máseleleri jónindegi «jedel jelisi» iske qosylǵan bolatyn. Osylaısha, qazaqstandyqtar barlyq zań buzý faktileri týraly 8 800 080 44 41 telefony boıynsha habarlaı alady. Ótinimder WhatsApp arqyly da + 77008004441 nómiri boıynsha qabyldanady.
«AMANAT» partııasy Respýblıkalyq qoǵamdyq qabyldaý bólmesiniń aqparatyna sáıkes, jer máselelerine qatysty ótinishterdiń basym kópshiligi Túrkistan (53,1%), Shyǵys Qazaqstan (17%), Aqmola (8,3%) jáne Pavlodar (8,3%) oblystarynyń turǵyndarynan kelip tústi.
Aıta ketý kerek, «Jer amanaty» komıssııasy jumysynyń nátıjesinde memleket menshigine elimiz boıynsha 293,2 myń gektar jaıylym jer qaıtaryldy.
Atap aıtqanda, Qaraǵandy oblysynda – 82 myń ga, Qostanaı oblysynda – 67,1 myń ga, Jambyl oblysynda – 46,3 myń ga, Jetisý oblysynda – 41,9 myń ga, Aqtóbe oblysynda – 20 myń ga, Túrkistan oblysynda – 17 myń ga, Soltústik Qazaqstan oblysynda – 18,9 myń ga.
«Jer amanaty» komıssııasynyń jumysy jalǵasýda.
“Adyrna” ulttyq portaly
