Búgin prezıdent Qasym-Jomart Toqaev premer-mınıstr Oljas Bektenovti qabyldady. Bul týraly Aqorda málimdedi, dep habarlaıdy ”Adyrna” ulttyq portaly.
«Bıyl qańtar-tamyz aılary aralyǵynda ekonomıkanyń ósimi 3,7 paıyzdy quraǵan. Aýyl sharýashylyǵyn jeńildikpen qarjylandyrý kólemi 3 ese ulǵaıyp, 580 mıllıard teńgege jetken. Búginde elimiz boıynsha dándi jáne burshaqty daqyldar alqabynyń 70,2 paıyzy jınalyp, 17,2 mıllıon tonna astyq bastyrylǵan», - degen esebinde Oljas Bektenov.
Premer-mınıstr prezıdentti elimizdiń óńirleri jylý berý maýsymyna 98,3% daıyn dep sendirdi.
«Áleýmettik nysandardyń daıyndyǵy joǵary deńgeıde. Turǵyn úılerdi jylytý maýsymyna ázirleý jumystary 98,3 paıyzǵa oryndalǵan. Elektr stanııalaryna jyl saıyn 60 mıllıon tonna kómir qajet. Qazir onyń qajetti qory bar», - dep habarlaǵan Bektenov.
Sonymen qatar, premer-mınıstr Toqaevqa sý tasqyny saldaryn joıý jónindegi buǵan deıin berilgen tapsyrmalarynyń oryndalý barysy men kelesi jyly sý tasqyny jaǵdaıynyń aldyn alý sharalary týraly aıtyp bergen.
«Zardap shekkenderdiń barlyǵyna áleýmettik qoldaý kórsetilip, búlingen dúnıe-múlki úshin ótemaqy tólengen. Baspanasynan aıyrylǵan úshin 5767 turǵyn úı satyp alyndy jáne 2576 jańa úı salynǵan. Aqmola men Batys Qazaqstan oblystaryndaǵy 104 nysanda jumys aıaqtalýǵa jaqyn», - dedi Bektenov.
Memleket basshysy elimizdiń ónerkásip áleýetin odan ári arttyrý jáne ınfraqurylymdy jańǵyrtý jóninde birqatar tapsyrma berdi.
