Qazaqstannyŋ tabiǧi körıktı oryndarynyŋ bırı – Şaryn şatqaly halyqaralyq reitingte joǧary orynǧa ie boldy, dep habarlaidy “Adyrna”.
Älemnıŋ 46 elınen ırıktelgen 100 kanon men şatqaldyŋ arasynda 17-orynǧa jaiǧasty. Būl reitingke Qazaqstannan engen jalǧyz tabiǧi nysan.
2026 jylǧy The Worldworthy 100 reitingı boiynşa Şaryn ūlttyq tabiǧi parkı Meksikadaǧy Basaseachic Canyon Falls şatqalynan keiın, Fransiiadaǧy Gorges de Daluis kanonynyŋ aldynda ornalasqan.
Zertteu barysynda reiting avtorlary turistık platformalardaǧy pıkırler men baǧalardy, halyqaralyq turistık gidter men būqaralyq aqparat qūraldaryndaǧy jariialanymdardy, sondai-aq aşyq jäne resmi derekterdı negızge alǧan.
Joba avtorlarynyŋ mälımetınşe, 2026 jylǧy reitingtı äzırleu kezınde 34,8 millionnan astam turistık pıkır taldanǧan. Al Şaryn ūlttyq parkıne berılgen baǧa 5 myŋnan astam saiahatşynyŋ pıkırı men baǧasyna negızdelgen.
Ūiymdastyruşylar reitingke nysandar özdıgınen ötınım bere almaitynyn jäne joǧary oryn alu üşın qarjy töleu mümkındıgı qarastyrylmaǧanyn atap öttı. Reiting turistık nysandardyŋ saiahatşylar arasyndaǧy tanymaldyǧy men halyqaralyq deŋgeide moiyndaluyn körsetedı.
Reiting qorytyndysy boiynşa Worldworthy redaksiiasy Şaryn memlekettık ūlttyq tabiǧi parkıne arnaiy sertifikat joldaǧan. Al 11 qaraşada Qazaqstannyŋ Orman şaruaşylyǧy jäne januarlar düniesı komitetı şatqaldyŋ älemdegı üzdık 20 nysannyŋ qataryna engenın habarlady.
Şaryn şatqaly erekşe geologiialyq qūrylymdarymen, alyp jartastarymen jäne körkem tabiǧatymen tanymal. Onyŋ eŋ körnektı bölıkterınıŋ bırı – biık jartastardan qūralǧan «Qamaldar aŋǧary». Almaty oblysynda ornalasqan būl tabiǧi nysan elımızdegı tanymal turistık baǧyttardyŋ bırı sanalady.
