Foto: PLANESPOTTERS
Täjıkstan men AQŞ ekı el arasynda tıkelei jolauşylar reisterın ıske qosu mäselesın talqylap jatyr. Jaŋa baǧyttardy Täjıkstannyŋ Somon Air jäne amerikalyq United Airlines äue kompaniialary oryndauy mümkın, dep habarlaidy "Adyrna" ūlttyq portaly Fergana agenttıgıne sıltep.
Qazırgı uaqytta ekı el arasyndaǧy äue qatynasy turaly ükımetaralyq kelısım jobasy äzırlenıp, tiıstı memlekettık organdardyŋ qarauyna jıberılgen.
Būl mäsele Duşanbede Täjıkstannyŋ Azamattyq aviasiia agenttıgınıŋ direktory Habibullo Nazarzoda men AQŞ elşılıgı ökılderınıŋ kezdesuınde talqylandy. Kezdesuge AQŞ diplomatiialyq missiiasynyŋ uaqytşa senımdı ökılı Karson Relis Roker bastaǧan delegasiia qatysty.
Taraptar tıkelei äue qatynasyn ūiymdastyru mümkındıkterın jäne azamattyq aviasiia salasyndaǧy yntymaqtastyqty damytu perspektivalaryn qarastyrdy. Täjıkstannyŋ Azamattyq aviasiia agenttıgınıŋ mälımetınşe, «Äue qatynasy turaly» ükımetaralyq kelısım jobasy qazır tiıstı ministrlıkter men vedomstvolardyŋ qarauynda. Qūjat tolyq kelısılgennen keiın tıkelei reisterdı ıske qosu jūmystary bastaluy mümkın.
Äzırge äue qatynasynyŋ naqty qaşan aşylatyny, AQŞ-tyŋ qai qalalaryna reister oryndalatyny jäne ūşu jiılıgı belgısız.
Tıkelei äue qatynasyn aşu mäselesı AQŞ-tyŋ vizalyq saiasaty küşeitılgen kezeŋde köterılıp otyr. 2026 jylǧy 21 qaŋtardan bastap Täjıkstan azamattary AQŞ-tyŋ B-1/B-2 sanatyndaǧy turistık jäne ıskerlık vizalaryn räsımdeu kezınde aqşalai kepıldık töleuge mındettı.
AQŞ Memlekettık departamentınıŋ mälımetınşe, kepıldık mölşerı 10 myŋ, 15 myŋ nemese 20 myŋ dollar boluy mümkın. Naqty somany konsuldyq qyzmetker sūhbat barysynda belgıleidı. Belgılengen talaptar oryndalyp, azamat AQŞ aumaǧynan uaqytynda şyqqan jaǧdaida, qarajat qaitarylady. Alaida kepıldık töleu vizanyŋ berıluıne kepıl bolmaidy.
Täjıkstan men AQŞ arasyndaǧy tıkelei äue qatynasyn aşu bastamasy būryn da köterılgen. 2024 jyldyŋ säuırınde Somon Air Duşanbe – Niu-Iork – Duşanbe baǧytyn 2025 jyly ıske qosudy josparlaǧanyn mälımdegen bolatyn. Alaida būl jospar jüzege aspady.
2025 jyldyŋ qaraşasynda ekı eldıŋ aviasiia salasyndaǧy ökılderı Vaşingtonda ötken kelıssözderde būl mäselenı qaita köterdı.
Sol kezeŋde «Ortalyq Aziia – AQŞ» sammitı aiasynda Somon Air men amerikalyq Boeing korporasiiasy 14 ūşaqqa deiın satyp alu jönındegı kelısımge qol jetkızgenın jariialady. Onyŋ ışınde tört Boeing 787-9 Dreamliner jäne on Boeing 737-8 MAX ūşaǧy bar.
Būl joba Somon Air kompaniiasynyŋ ūzaq qaşyqtyqqa ūşatyn keŋ fiuzeliajdy ūşaqtardy satyp alu jönındegı alǧaşqy bastamasy sanalady. Kompaniianyŋ mälımdeuınşe, jaŋa äue kemelerı Duşanbe qalasynan Europa, Aziia jäne Taiau Şyǧystan bölek, qūrlyqaralyq baǧyttardy aşuǧa mümkındık beredı.
Osylaişa, Täjıkstannyŋ AQŞ-pen tıkelei äue qatynasyn ornatu jospary bırtındep naqty kezeŋge ötıp keledı. Degenmen reisterdıŋ bastaluy ükımetaralyq kelısımnıŋ bekıtıluıne jäne äue kompaniialarynyŋ daiyndyq jūmystaryna bailanysty bolmaq.
