Фото: PLANESPOTTERS
Тәжікстан мен АҚШ екі ел арасында тікелей жолаушылар рейстерін іске қосу мәселесін талқылап жатыр. Жаңа бағыттарды Тәжікстанның Somon Air және америкалық United Airlines әуе компаниялары орындауы мүмкін, деп хабарлайды "Адырна" ұлттық порталы Fergana агенттігіне сілтеп.
Қазіргі уақытта екі ел арасындағы әуе қатынасы туралы үкіметаралық келісім жобасы әзірленіп, тиісті мемлекеттік органдардың қарауына жіберілген.
Бұл мәселе Душанбеде Тәжікстанның Азаматтық авиация агенттігінің директоры Хабибулло Назарзода мен АҚШ елшілігі өкілдерінің кездесуінде талқыланды. Кездесуге АҚШ дипломатиялық миссиясының уақытша сенімді өкілі Карсон Релиц Рокер бастаған делегация қатысты.
Тараптар тікелей әуе қатынасын ұйымдастыру мүмкіндіктерін және азаматтық авиация саласындағы ынтымақтастықты дамыту перспективаларын қарастырды. Тәжікстанның Азаматтық авиация агенттігінің мәліметінше, «Әуе қатынасы туралы» үкіметаралық келісім жобасы қазір тиісті министрліктер мен ведомстволардың қарауында. Құжат толық келісілгеннен кейін тікелей рейстерді іске қосу жұмыстары басталуы мүмкін.
Әзірге әуе қатынасының нақты қашан ашылатыны, АҚШ-тың қай қалаларына рейстер орындалатыны және ұшу жиілігі белгісіз.
Тікелей әуе қатынасын ашу мәселесі АҚШ-тың визалық саясаты күшейтілген кезеңде көтеріліп отыр. 2026 жылғы 21 қаңтардан бастап Тәжікстан азаматтары АҚШ-тың B-1/B-2 санатындағы туристік және іскерлік визаларын рәсімдеу кезінде ақшалай кепілдік төлеуге міндетті.
АҚШ Мемлекеттік департаментінің мәліметінше, кепілдік мөлшері 10 мың, 15 мың немесе 20 мың доллар болуы мүмкін. Нақты соманы консулдық қызметкер сұхбат барысында белгілейді. Белгіленген талаптар орындалып, азамат АҚШ аумағынан уақытында шыққан жағдайда, қаражат қайтарылады. Алайда кепілдік төлеу визаның берілуіне кепіл болмайды.
Тәжікстан мен АҚШ арасындағы тікелей әуе қатынасын ашу бастамасы бұрын да көтерілген. 2024 жылдың сәуірінде Somon Air Душанбе – Нью-Йорк – Душанбе бағытын 2025 жылы іске қосуды жоспарлағанын мәлімдеген болатын. Алайда бұл жоспар жүзеге аспады.
2025 жылдың қарашасында екі елдің авиация саласындағы өкілдері Вашингтонда өткен келіссөздерде бұл мәселені қайта көтерді.
Сол кезеңде «Орталық Азия – АҚШ» саммиті аясында Somon Air мен америкалық Boeing корпорациясы 14 ұшаққа дейін сатып алу жөніндегі келісімге қол жеткізгенін жариялады. Оның ішінде төрт Boeing 787-9 Dreamliner және он Boeing 737-8 MAX ұшағы бар.
Бұл жоба Somon Air компаниясының ұзақ қашықтыққа ұшатын кең фюзеляжды ұшақтарды сатып алу жөніндегі алғашқы бастамасы саналады. Компанияның мәлімдеуінше, жаңа әуе кемелері Душанбе қаласынан Еуропа, Азия және Таяу Шығыстан бөлек, құрлықаралық бағыттарды ашуға мүмкіндік береді.
Осылайша, Тәжікстанның АҚШ-пен тікелей әуе қатынасын орнату жоспары біртіндеп нақты кезеңге өтіп келеді. Дегенмен рейстердің басталуы үкіметаралық келісімнің бекітілуіне және әуе компанияларының дайындық жұмыстарына байланысты болмақ.
