Qazaq ūlttyq sport universitetınıŋ negızın qalauşy Nūrasyl Medeu oqu ornyn memleketke öteusız beru turaly şeşım qabyldady, dep habarlaidy "Adyrna" ūlttyq portaly.
2021 jyly 150 studentı bar Dene şynyqtyru jäne būqaralyq sport akademiiasy retınde qūrylǧan oqu orny bügınde bes myŋǧa juyq student bılım alatyn universitetke ainalǧan.
Bes jyl ışınde universitet halyqaralyq serıktestıkter ornatyp, sport ǧylymyn damytuǧa arnalǧan zerthanalar men ortalyqtar aşqan. Sonymen qatar qos diplomdy bılım beru baǧdarlamalaryn ıske qosyp, sporttyŋ türlı baǧyttary boiynşa jobalardy jüzege asyrǧan.
Universitet negızın qalauşynyŋ aituynşa, oqu ornyn memleketke beru turaly şeşım keiınnen qabyldanbaǧan. Mūndai niet universitet qūrylǧan kezden bastap bolǧan.
«Kez kelgen alypqaşpa äŋgımege nükte qoiǧym keledı. Būl – satu da emes, senımgerlık basqaruǧa beru de emes, mäjbürlı türde jasalǧan qadam da emes. Būl – tuǧan elıme jasalǧan öteusız syi», – dedı Nūrasyl Medeu.
Universitet Halyqaralyq Olimpiada komitetımen bırlesıp, Olimpiadalyq zertteuler, bılım beru jäne mūra ortalyǧyn aşqan. Sondai-aq dopingke qarsy bılım beru, kibersport, sport jurnalistikasy jäne qūtqaru sporty baǧyttarynda jobalar jüzege asyrylǧan.
Būdan bölek, oqu ornynda talantty jastardy qoldauǧa arnalǧan granttar qarastyrylǧan. Olar oqu aqysyn töleudı, şäkırtaqy aludy, jataqhanamen qamtamasyz etudı jäne şetelde bılım alu mümkındıkterın qamtidy.
Nūrasyl Medeu studentter aldyndaǧy barlyq mındetteme, sonyŋ ışınde būryn taǧaiyndalǧan granttardy qarjylandyru da tolyq saqtalatynyn mälımdedı.
«Qazaqstannyŋ bolaşaǧyna osyndai üles qosu men üşın ülken märtebe. Bız qūrǧannyŋ barlyǧy jastarǧa, otandyq sportqa jäne elımızge qyzmet etuı kerek», – dedı universitet negızın qalauşy.
Oqu ornyn memleketke öteusız beru bastamasy sporttyq bılım beru jüiesın damytuǧa, jas mamandardy daiarlauǧa jäne sport ǧylymyn ılgerıletuge baǧyttalǧan qadam retınde baǧalanyp otyr.
Aita keteiık, Nūrasyl Medeu - Qūryltai deputaty Dana Medeuovanyŋ ūly.
