Foto: Ükımettıŋ baspasöz qyzmetı
Eŋbek jäne halyqty äleumettık qorǧau ministrı Asqarbek Ertaev Qazaqstandaǧy otbasylardyŋ äleumettık jaǧdaiyn baǧalauǧa arnalǧan onlain-kalkuliatordy tanystyrdy. Ministr özınıŋ tabysy men otbasy turaly mälımetterdı engızıp, qai sanatqa jatatynyn tekserdı, dep habarlaidy "Adyrna" ūlttyq portaly Tengrinews.kz saityna sıltep.
Asqarbek Ertaevtyŋ aituynşa, ol 49 jasta, ai saiynǧy jalaqysy – 1,2 million teŋge. Jūbaiy jūmys ıstemeidı, otbasynda tört bala bar.
Ministrdıŋ Astana qalasynda audany 100 jäne 60 şarşy metr bolatyn ekı päterı bar. Sonymen qatar, ol 2013 jylǧy Toyota Camry 50 avtokölıgın mınedı. Otbasynda jeke biznes te, jer uchaskelerı de joq.
Ministrdıŋ 29 jastaǧy ülken ūly aiyna 600 myŋ teŋge tabys tapsa, 23 jastaǧy ortanşy ūlynyŋ ailyq kırısı – 400 myŋ teŋge. Sondai-aq otbasynda 13 jastaǧy qyzy men tört jasar kenje ūly bar.
Onlain-kalkuliatorǧa engızılgen derekter boiynşa, ministrdıŋ otbasy B sanatyna jatqyzyldy. Būl sanattaǧy otbasylar äleumettık tölemderdıŋ basym bölıgın aluǧa ümıtker bola almaidy.
«Soŋǧy ret törtınşı balamyz düniege kelgende järdemaqy aldyq. Būl 2022 jyly bolǧan edı. Sodan berı eşqandai järdemaqy almaimyz. Eger qazır qandai da bır järdemaqy alyp jürgen bolsam, odan bas tartuǧa daiyn bolar edım», – dedı Asqarbek Ertaev.
Aita ketsek, Qazaqstanda äleumettık äl-auqat deŋgeiın bes sanatqa – A, B, C, D jäne E toptaryna bölu josparlanyp otyr. Otbasynyŋ qai sanatqa jatatyny memlekettık aqparattyq jüielerdegı otbasy qūramy men tabysyna qatysty mälımetter negızınde anyqtalady. Būl rette Otbasynyŋ sifrlyq kartasynyŋ derekterı de qoldanylady.
