Metallurgiialyq qaldyqtardy tonnalap jinap saqtaudyŋ ornyna, olardy qorşaǧan ortaǧa qamqorlyqpen qarai otyryp, tabys közıne ainaldyruǧa bolady. Aqmola oblysynda osy baǧytta bıregei qaita öŋdeu keşenı jūmysyn bastady. Tolyǧyraq Işkı saiasat basqarmasynyŋ materialynda.
Zerendı audanynda «Open Minerals Group Processing» JŞS-nıŋ zamanaui öndırıstık keşenı resmi türde ıske qosyldy. Jaŋa zauyt qūramynda qorǧasyny bar şikızat pen mys balqytu öndırısterınıŋ janama önımderın qaita öŋdep, olardy qosylǧan qūny joǧary, sūranysqa ie önımge ainaldyrady.
Mūndai käsıporynnyŋ aşyluy jergılıktı ekonomika üşın şikızat öndıruge ǧana baǧyttalǧan modelden tehnologiialyq öŋdeuge köşuge mümkındık beredı. Zauyt ai saiyn 2–3 myŋ tonna şikızat qabyldap, qorǧasyn kegı men sementasiialyq mys öndıredı. Daiyn önım qoimalarda jatyp qalmai, otandyq metallurgiia salasynyŋ öndırıstık tızbegıne bırden qosylady. Keşennıŋ serıktesterı qatarynda salanyŋ ırı käsıporyndary – «Qazaqmys» korporasiiasy men «Qazsink» kompaniiasy bar.
Jobaǧa 7,4 mlrd teŋge investisiia salyndy. Al biudjetke tölengen salyq kölemı qazırdıŋ özınde şamamen 22 mln teŋgenı qūrady.
«Şikızatty qaita öŋdeudıŋ zamanaui tehnologiialaryn engızudıŋ maŋyzy erekşe. Belgılengen tehnologiialyq talaptar men tabiǧatty qorǧau normalary saqtalǧan jaǧdaida, mūndai şeşımder mineraldyq resurstardy paidalanu tiımdılıgın arttyruǧa jäne ärı qarai saqtauǧa jıberıletın qaldyqtar kölemın azaituǧa mümkındık beredı. Öndırıstıŋ ekologiialyq qauıpsızdıgı jäne önerkäsıptık qaldyqtardy ūtymdy basqaru osyndai käsıporyndardyŋ tūraqty jūmys ısteuınıŋ maŋyzdy şarttary bolyp qala beredı», – dedı Aqmola oblysynyŋ äkımı Marat Ahmetjanov nysannyŋ aşylu saltanatynda.
Joba avtorlary öndırıstık üderısterdıŋ ekologiialyq qauıpsızdıgıne erekşe nazar audarǧan. Metallurgiialyq qaldyqtardy qaita öŋdeu qūndy komponentterdı qaitadan şaruaşylyq ainalymyna engızuge ǧana emes, qaldyqtardy saqtau oryndaryna tüsetın jüktemenı azaityp, qorşaǧan ortaǧa tönetın qauıp-qaterlerdı tömendetuge de mümkındık beredı. Tabiǧatty qorǧau talaptaryn qataŋ saqtau öndırıstık nysannyŋ öŋırdıŋ bükıl industriialyq tızbegındegı ekologiialyq tūrǧydan tiımdı buynǧa ainaluyna yqpal etedı.
Käsıporyn aldaǧy uaqytta öndırıs auqymyn edäuır keŋeitudı josparlap otyr. Kelesı kezeŋde mūnda pirometallurgiialyq tehnologiialardy engızu közdelgen. Būl qara qorǧasyn öndırısın aiyna 1 myŋ tonnaǧa deiın arttyruǧa, sondai-aq metaldyq surma men mys konsentratyn öndırudı jolǧa qoiuǧa mümkındık beredı.
Öndırıstı keŋeitu jūmys oryndarynyŋ sanyn arttyrudy talap etedı. Qazırdıŋ özınde käsıporynda 100-den astam adam tūraqty jūmyspen qamtylǧan. Olardyŋ jalaqysy öŋırdegı ortaşa körsetkışten joǧary.
İnvestorlardyŋ keluı öndırıs oryndarynan alys tūratyn tūrǧyndarǧa da oŋ äserın tigızude. Kompaniia äleumettık jauapkerşılık aiasynda jergılıktı infraqūrylymdy damytuǧa üles qosyp keledı. Azat stansiiasynda zamanaui balalar oiyn alaŋy, futbol jäne basketbol alaŋdary, sondai-aq vorkautpen ainalysuǧa arnalǧan arnaiy aimaq salyndy. Dolomitovyi kentındegı barlyq negızgı köşelerge asfalt töseldı.
Mūndai bastamalar öŋırdegı industriialyq ösımnıŋ şaǧyn eldı mekenderdegı ömır sapasyn jaqsartumen qatar jüre alatynyn körsetedı.
