Металлургиялық қалдықтарды тонналап жинап сақтаудың орнына, оларды қоршаған ортаға қамқорлықпен қарай отырып, табыс көзіне айналдыруға болады. Ақмола облысында осы бағытта бірегей қайта өңдеу кешені жұмысын бастады. Толығырақ Ішкі саясат басқармасының материалында.
Зеренді ауданында «Open Minerals Group Processing» ЖШС-нің заманауи өндірістік кешені ресми түрде іске қосылды. Жаңа зауыт құрамында қорғасыны бар шикізат пен мыс балқыту өндірістерінің жанама өнімдерін қайта өңдеп, оларды қосылған құны жоғары, сұранысқа ие өнімге айналдырады.
Мұндай кәсіпорынның ашылуы жергілікті экономика үшін шикізат өндіруге ғана бағытталған модельден технологиялық өңдеуге көшуге мүмкіндік береді. Зауыт ай сайын 2–3 мың тонна шикізат қабылдап, қорғасын кегі мен цементациялық мыс өндіреді. Дайын өнім қоймаларда жатып қалмай, отандық металлургия саласының өндірістік тізбегіне бірден қосылады. Кешеннің серіктестері қатарында саланың ірі кәсіпорындары – «Қазақмыс» корпорациясы мен «Қазцинк» компаниясы бар.
Жобаға 7,4 млрд теңге инвестиция салынды. Ал бюджетке төленген салық көлемі қазірдің өзінде шамамен 22 млн теңгені құрады.
«Шикізатты қайта өңдеудің заманауи технологияларын енгізудің маңызы ерекше. Белгіленген технологиялық талаптар мен табиғатты қорғау нормалары сақталған жағдайда, мұндай шешімдер минералдық ресурстарды пайдалану тиімділігін арттыруға және әрі қарай сақтауға жіберілетін қалдықтар көлемін азайтуға мүмкіндік береді. Өндірістің экологиялық қауіпсіздігі және өнеркәсіптік қалдықтарды ұтымды басқару осындай кәсіпорындардың тұрақты жұмыс істеуінің маңызды шарттары болып қала береді», – деді Ақмола облысының әкімі Марат Ахметжанов нысанның ашылу салтанатында.
Жоба авторлары өндірістік үдерістердің экологиялық қауіпсіздігіне ерекше назар аударған. Металлургиялық қалдықтарды қайта өңдеу құнды компоненттерді қайтадан шаруашылық айналымына енгізуге ғана емес, қалдықтарды сақтау орындарына түсетін жүктемені азайтып, қоршаған ортаға төнетін қауіп-қатерлерді төмендетуге де мүмкіндік береді. Табиғатты қорғау талаптарын қатаң сақтау өндірістік нысанның өңірдің бүкіл индустриялық тізбегіндегі экологиялық тұрғыдан тиімді буынға айналуына ықпал етеді.
Кәсіпорын алдағы уақытта өндіріс ауқымын едәуір кеңейтуді жоспарлап отыр. Келесі кезеңде мұнда пирометаллургиялық технологияларды енгізу көзделген. Бұл қара қорғасын өндірісін айына 1 мың тоннаға дейін арттыруға, сондай-ақ металдық сурьма мен мыс концентратын өндіруді жолға қоюға мүмкіндік береді.
Өндірісті кеңейту жұмыс орындарының санын арттыруды талап етеді. Қазірдің өзінде кәсіпорында 100-ден астам адам тұрақты жұмыспен қамтылған. Олардың жалақысы өңірдегі орташа көрсеткіштен жоғары.
Инвесторлардың келуі өндіріс орындарынан алыс тұратын тұрғындарға да оң әсерін тигізуде. Компания әлеуметтік жауапкершілік аясында жергілікті инфрақұрылымды дамытуға үлес қосып келеді. Азат станциясында заманауи балалар ойын алаңы, футбол және баскетбол алаңдары, сондай-ақ воркаутпен айналысуға арналған арнайы аймақ салынды. Доломитовый кентіндегі барлық негізгі көшелерге асфальт төселді.
Мұндай бастамалар өңірдегі индустриялық өсімнің шағын елді мекендердегі өмір сапасын жақсартумен қатар жүре алатынын көрсетеді.
