Qazaq önerıne özındık ülesın qosqan änşı, öner qairatkerı Bolat Äbdıahmetov dünieden öttı. Qaiǧyly habardy öner iesınıŋ jaqyndary äleumettık jelıdegı paraqşalarynda jariialady, dep habarlaidy "Adyrna".
«Qazaqtyŋ käsıbi önerıne özındık ülesın qosqan, bırtuar azamat, käsıbi änşı, öner qairatkerı Bolat Äbdıahmetovtıŋ dünieden ötuıne bailanysty jaryna, bala-şaǧasyna, tuǧan-tuystary men jaqyndaryna qaiǧyryp köŋıl aitamyz. Bolat Äbdıahmetov – Mäskeude käsıbi bılım alyp, önerdıŋ biık belesterın baǧyndyrǧan, qazaq mädenietı men önerıne adal qyzmet etken ziialy azamat edı. Ömırde aqjarqyn mınezımen, körgendılıgımen, parasat-paiymymen elınıŋ qūrmetıne bölengen abzal jan bolatyn», – delıngen jazbada.
Bolat Äbdıahmetov Abai oblysyndaǧy oblysyndaǧy Şar qalasynda düniege kelgen. Mäskeu memlekettık muzyka uchilişesınde estrada jäne djaz salasy boiynşa bılım alǧan. Ol ūzaq jyldar boiy qazaq mädenietı men önerınıŋ damuyna üles qosyp, körermenge bırneşe tanymal änın ūsyndy.
Änşı köpşılıkke «Jalaŋaiaq qyz», «Sūluym» sekıldı şyǧarmalarymen keŋınen tanyldy. Mūqaǧali Maqataevtyŋ sözıne jazylǧan «Jalaŋaiaq qyz» änı onyŋ şyǧarmaşylyq mūrasyndaǧy tanymal tuyndylardyŋ bırıne ainaldy. Än Ortalyq Aziia elderımen qatar Europanyŋ bırqatar memleketterınde de tyŋdarman yqylasyna bölengen.
Şyǧarmaşylyq qyzmetı barysynda Qazaqstannan bölek Özbekstan, Resei, Qytai jäne Tailandta öner körsetıp, türlı konserttık baǧdarlamalarǧa qatysty.
