Almatynyŋ Türksıb audanynda Vladimir Leninnıŋ eskertkışı alynyp tastaldy, dep habarlaidy «Adyrna» tılşısı Ulysmedia.kz-ke sılteme jasap.
Eskertkış Seifullin daŋǧyly men Şolohov köşesınıŋ qiylysyndaǧy saiabaqta tūrǧan. Tamyz aiynyŋ ortasynda aumaq qorşalyp, tūrǧyndarǧa bolaşaq balalar oiyn alaŋynyŋ jobasy ūsynylǧan. Keiın monument ornynan joǧalyp ketken. Qazır būl jerde qūrylys tehnikasy jūmys ıstep jatyr.
Eskertkıştıŋ alynuy äleumettık jelılerde qyzu pıkırtalas tudyrdy. Bırqatar tūrǧyndar keŋestık kezeŋnıŋ simvolyn alyp tastaudy qoldasa, endı bıreulerı qūrylys jūmystarynyŋ jürgızıluıne qatysty syn aitty.
Almaty qalasy äkımdıgınıŋ mälımetınşe, monument jöndeu jäne abattandyru jūmystary kezeŋınde uaqytşa alynǧan. Jūmystar aiaqtalǧannan keiın eskertkış būrynǧy ornyna qaita ornatylady.
Aita keteiık, Lenin eskertkışı Qazaqstan täuelsızdık alǧannan keiın de Türksıb audanyndaǧy saiabaqta saqtalyp kelgen. Al būǧan deiın ol Almatynyŋ ortalyq bölıgınde ornalasqan bolatyn. 1990-jyldary monument qazırgı ornyna köşırılgen.
Suret: «Vesti Almaty»
