Ündıstannyŋ Paradip portynda bortynda 23 teŋızşısı bar MT UNITY kemesı ūstaldy, dep habarlaidy “Adyrna”.
Būl turaly Qazaqstannyŋ SIM habarlady.
Ekipaj qūramynda Qazaqstan Respublikasynyŋ azamaty bar.
Syrtqy ıster ministrlıgınıŋ resmi ökılı Janbolat Üsenovtıŋ mälımetınşe, kemenı ūstauǧa onyŋ iesınıŋ jergılıktı janarmai jetkızuşı aldyndaǧy qarjylyq bereşegı sebep bolǧan.
«Qazaqstandyq diplomattar azamatymyzdyŋ elge qaituyn qamtamasyz etu üşın qajettı şaralardy qabyldap jatyr», – dedı Janbolat Üsenov.
Onyŋ aituynşa, jaǧdaidy retteuge järdem körsetu üşın Ündıstannyŋ syrtqy ıster ministrlıgıne tiıstı diplomatiialyq nota joldanǧan.
Sonymen qatar SIM atalǧan Qazaqstan azamaty men onyŋ otbasy müşelerı Qazaqstannyŋ diplomatiialyq ökıldıkterıne kömek sūrap jügınbegenın habarlady.
Būǧan deiın BAQ Kamerun tuy astynda jüzetın MT UNITY tankerınıŋ 11 mamyrdan berı Ündıstanda ūstalyp tūrǧanyn habarlaǧan. Keme jük tüsıru jūmystaryn aiaqtaǧannan keiın onyŋ iesıne qatysty qarjylyq talaptarǧa bailanysty qamauǧa alynǧan. Dauly ıske qatysy bar ekı kompaniia da Bırıkken Arab Ämırlıkterınde tırkelgen. Qazır ıstı Ündıstannyŋ Orissa ştatynyŋ soty qarap jatyr.
