Energetika ministrı Erlan Aqkenjenov Japoniianyŋ Ekonomika, sauda jäne önerkäsıp vise-ministrı Kendji Iаmadamen kezdesu ötkızdı. Būl turaly 8 qyrküiekte ministrlıktıŋ baspasöz qyzmetı jazdy, dep habarlaidy «Adyrna» tılşısı.
Kezdesu barysynda taraptar Qazaqstan men Japoniia arasyndaǧy energetika jäne ekonomika salalaryndaǧy yntymaqtastyqtyŋ qazırgı jaǧdaiy men damu perspektivalaryn, sondai-aq joǧary deŋgeide qol jetkızılgen uaǧdalastyqtardy odan ärı ıske asyru mäselelerın talqylaǧan. Mūnai-gaz salasyndaǧy özara ıs-qimylǧa, onyŋ ışınde mūnai öŋdeu infraqūrylymyn damytu, investisiialar tartu jäne zamanaui tehnologiialardy engızu mäselelerıne erekşe nazar audarylǧan.
«Erlan Aqkenjanov Qazaqstannyŋ eleulı tehnologiialyq jäne investisiialyq äleuetke ie japondyq serıktestermen ūzaq merzımdı yntymaqtastyqty keŋeituge müddelı ekenın atap öttı. Öz kezegınde Qazaqstan aitarlyqtai resurstyq bazaǧa, tiımdı geografiialyq ornalasuǧa ie jäne ırı investisiialyq jobalardy ıske asyru üşın qajettı jaǧdailar qalyptastyruda.
Kelıssözder barysynda jaŋartylatyn energiia közderı jäne tömen kömırtektı damu salalaryndaǧy yntymaqtastyqty damytuǧa da erekşe köŋıl bölındı. Qazaqstan japondyq kompaniialardy jaŋartylatyn energiia közderı jobalaryn ıske asyruǧa odan ärı tartuǧa, sondai-aq ekıjaqty klimattyq jäne tehnologiialyq bastamalar şeŋberındegı yntymaqtastyqty damytuǧa müddelı»,– delıngen habarlamada.
Taraptar elektr energetikasyn damytu, energetikalyq infraqūrylymdy jaŋǧyrtu jäne energiiamen jabdyqtau senımdılıgın arttyru mäselelerı boiynşa da pıkır almasqan.
Kezdesu qorytyndysy boiynşa taraptar syndarly dialogty jalǧastyruǧa jäne Qazaqstan men Japoniia arasyndaǧy energetika salasyndaǧy ärıptestıktı odan ärı nyǧaituǧa müddelı ekenderın rastaǧan.
