Qazaqstanda atom elektr stansiiasyn salatyn «Rosatom» korporasiiasy Mysyrdaǧy AES qūrylysy jobasynda qauıpsızdık talaptaryn būzdy degen aiypqa ılıktı. Būl turaly amerikalyq Politico basylymy jazdy, dep habarlaidy «Adyrna» tılşısı.
Basylym mälımetınşe, 4 mausymda joldanǧan qūpiia hatta Mysyrdyŋ Atom elektr stansiialary basqarmasy «Rosatom» basşylyǧyna «El-Dabaa» atom elektr stansiiasynyŋ bırneşe reaktor blogynda anyqtalǧan aqaular men qūrylys barysynda iadrolyq qauıpsızdık mädenietınıŋ būzylǧanyn habarlaǧan.
Qūjatta körsetılgen negızgı mäseleler:
Qauıpsızdık talaptarynyŋ būzyluy men tehnikalyq aqaular. Bırneşe reaktor blogynda kemşılıkter anyqtalǧany jäne iadrolyq qauıpsızdık mädenietıne qatysty talaptardyŋ saqtalmaǧany aitylǧan.
«Qasaqana nemqūrailylyq» turaly aiyp. Mysyr tarapy jobaǧa jauapty lauazymdy tūlǧalardyŋ bırın qasaqana salǧyrttyq tanytty dep aiyptaǧan.
Kıru baqylauyndaǧy zaŋbūzuşylyqtar. Jalǧan rūqsatnamalardy paidalanu, qūrylys alaŋyna rūqsatsyz kıru, sondai-aq nysanda foto jäne beinetüsırılım jürgızu faktılerı tırkelgen.
Öndırıstık jaraqat oqiǧasy. Auyr aşyq synyq alǧan jūmysşynyŋ jedel järdem kölıgımen emes, jeke avtokölıkpen auruhanaǧa jetkızılgenı körsetılgen.
İnjenerlık qiyndyqtar men keşıguler. «Rosatomnyŋ» ışkı esepterınde qūrylys jūmystarynyŋ keşeuıldep jatqany jäne tehnikalyq qiyndyqtar bar ekenı aitylǧan. Atap aitqanda, iadrolyq araldyŋ jerüstı nysandary älı de jerasty jūmystaryn jürgızu kezeŋınde tūr.
Politico avtorlarynyŋ pıkırınşe, Mysyrdaǧy mäseleler Vengriiaǧa jäne Viktor Orban däuırınde jasalǧan Reseimen bailanysty kelısımderdı qaita qarastyryp jatqan premer-ministr Peter Madiar ükımetıne Euroodaq tarapynan qysymdy küşeituı mümkın.
Al «Rosatom» korporasiiasy būl aiyptaulardyŋ barlyǧyn joqqa şyǧaryp otyr. Kompaniia ökılderınıŋ mälımdeuınşe, qūrylys jūmystary bekıtılgen kestege säikes jürgızılude jäne Mysyr retteuşısınıŋ talaptary men halyqaralyq standarttarǧa tolyq sai keledı.
Eske salsaq, Qazaqstan men Resei Almaty oblysynyŋ Ülken auylynda ornalasatyn «Balqaş» atom elektr stansiiasyn salu jönınde kelısımge kelgen. Jobany jüzege asyratyn halyqaralyq konsorsiumnyŋ jetekşısı retınde «Rosatom» taŋdalǧan.
