Taldyqorǵan joǵary polıtehnıkalyq kolledji NCCER qurylys salasyndaǵy ulttyq oqytý jáne zertteý ortalyǵynda akkredıttelgen oqý ortalyǵy mártebesin alý maqsatynda halyqaralyq salalyq baǵalaýdyń úshinshi kezeńin aıaqtady. Sondaı-aq, bilim berý mekemesi Germanııanyń Aǵa sarapshylar qyzmetimen birlesip yntymaqtastyq jobasyna qatysýdy josparlap otyr, - dep habarlaıdy Jetisý oblysy ákiminiń baspasóz qyzmeti.
Polıtehnıkalyq kolledj IT-mamandar daıarlaýda jaqsy nátıjelerge qol jetkizgen tabysty bilim berý mekemesi retinde tanylyp otyr. Mysaly, statıstıkalyq derekterge súıensek, 2020 jyly IT baǵyty boıynsha kolledj túlekteriniń 92%-y jumysqa ornalassa, al ótken jyly bul kórsetkish 96%-dy qurady. Bul 2019 jyly IT-ortalyq kolledjiniń bazasynda STEM-aımaq, kovorkıng ortalyǵy, beıne jáne fotostýdııa, Bıznes-ınkýbator, WorldSkills jattyǵý lageri qurylyp, jumys kórnekti nátıjesin berdi. Munda sonymen qatar Cisco jáne steam jelilik akademııalary jumys isteıdi. Ortalyqta stýdentterge arnalǵan Web-dızaındeý men ázirleý, 3D-modeldeý, CAD platformasynda jobalaý praktıkalyq sabaqtary men oqytý kýrstary ótkiziledi. Sondaı-aq kolledjde jańa IT-tehnologııalardy meńgerýge arnalǵan zerthana jumys isteıdi. Jalpy búginde oblys boıynsha 59 IT-synyp, 12 STEAM-kabınet, IT-mektep bar.
Sonymen qatar kolledj qazirgi zamanǵy eńbek naryǵynyń talaptaryn eskerip, qurylys salasynda mamandar daıarlaýǵa erekshe kóńil bóledi. Búgingi tańda kolledjde qurylys mamandyqtary boıynsha 141 stýdent bilim alýda.
Kolledj dırektory Erqat Muqajanovtyń aıtýynsha, bilim ordasy búginde NCCER "Project Supervision" baǵdarlamasy boıynsha Ulttyq oqytý jáne qurylys salasyndaǵy zertteý ortalyǵynda akkredıttelgen oqý ortalyǵy mártebesin alý úshin halyqaralyq salalyq baǵalaýdyń úshinshi kezeńin aıaqtady. Akkredıtaııadan sátti ótken jaǵdaıda mekeme qurylys salasyndaǵy jumyskerlerdi sertıfıkattaýǵa quqyq beretin halyqaralyq úlgidegi tıisti qujatqa ıe bolady. Bul sertıfıkat maman quzyretiniń kásibı standarttarǵa, onyń ishinde halyqaralyq standarttardyń talaptaryna sáıkestigin tanýǵa jáne rastaýǵa arnalǵan. Halyqaralyq salalyq attestattaýdyń barlyq kezeńderin jyl sońyna deıin aıaqtaý josparlanyp otyr.
- Eń basty mindetimizdiń biri - túlekterimizdi jumysqa ornalastyrý deńgeıin arttyrý, olardyń biliminiń, iskerligi men daǵdylarynyń básekege qabilettiligin kóterý. Sondyqtan biz qurylys mamandyqtary boıynsha halyqaralyq salalyq akkredıtteýden ótýge shyndap kiristik. Bul rette bizge "Talap" KEAQ tıisti qoldaý kórsetti. Osy synaqtan sátti ótsek, bul bizge qurylys salasyndaǵy jumysshylardyń biliktilikteri boıynsha ımport almastyrýdy qamtamasyz etýge múmkindik beredi. Birte-birte otandyq iri kompanııalarǵa sheteldik mamandardy jumysqa shaqyrýdyń qajeti de bolmaı qalady. Bul rette bizdiń túlekterimiz qoldaryna halyqaralyq sertıfıkat alyp, ózderiniń básekege qabilettilik deńgeıin arttyryp qana qoımaıdy, sonymen qatar olardyń eńbegine aqy tóleý deńgeıi de edáýir artady, demek jyl ótken saıyn biz keńsede jumys isteıtinder ǵana jaqsy aqsha taba alady degen stereotıpti jeńemiz. Demek, jastar kolledjde oqyp, qajetti jumysshy mamandyǵyn meńgerip, tabysty bola alatynyn túsine bastaıdy, - dep atap ótti E.Muqajanov.
Kolledj basshysynyń aıtýynsha, osy jobanyń sheńberinde mekemeniń 5 oqytýshysy 1-5 tamyz aralyǵynda birneshe pozıııa boıynsha qysqa merzimdik kýrstan ótken. Endi olar NCCER bazasynda oqytýshy, úlgerimdi baqylaýshy, oqý baǵdarlamasynyń ınspektory retinde tirkelgen.
Germanııanyń Aǵa sarapshylar qyzmetine (SES – Senior Experten Service) qatysty aıtar bolsaq, joba «aqparattyq tehnıka», «kommýnıkaııa quraldary», «qurylys isi» salalaryna bilikti kadr daıarlaýǵa baılanysty máselelerge saraptamalyq qoldaý kórsetýge arnalǵan. SES sarapshylary óz qyzmetin Azııada, Latyn Amerıkasynda, Shyǵys jáne Ońtústik-Shyǵys Eýropada, ıaǵnı halyqaralyq deńgeıde júzege asyrady. Osy atalǵan elderdiń barlyǵynda qoǵamdyq negizde jáne suranysqa qaraı olar ózderiniń saraptamalyq bilimderin, kásibı tájirıbeleri taratady.
Kolledj basshylyǵy jobaǵa qatysý jergilikti jerlde mekemeniń oqytýshylary men óndiristik oqytý sheberleriniń biliktiligin arttyrýǵa yqpal etetinin aıtady. Qazirgi kezde jobanyń bastalatyn ýaqyty kelisilýde, bul aldyn ala jospar boıynsha bıylǵy jyldyń qazan-qarasha aılarynda bolmaq.
Jalpy bıylǵy oqý jylynda Taldyqorǵan joǵary polıtehnıkalyq kolledjinde 2564 stýdent bilim aldy, 5 tamyzdaǵy jaǵdaı boıynsha stýdentter sany 1529, taǵy 680-ge jýyq adamdy qabyldaý josparlanýda. Bilim berý mekemesiniń pedagogıkalyq quramy kolledj stýdentteri men túlekterge berilgen múmkindikter olardyń eńbek naryǵynda suranysqa ıe bolýyna oń áser etetinine jáne óńirdi zamanaýı jas bilikti kadrlarmen qamtamasyz etetinine senimdi.
Jetisý oblysy ákiminiń baspasóz qyzmeti.
