«Adyrna» ulttyq portalynda “Almaty oblysy sot ǵımaratyn 5 aıǵa jaldaý úshin 50 mıllıonnan astam teńge qarjy bóldi” degen synı maqala jarııalanǵan edi. Sol materıalda kóterilgen máselerge qatysty oblystyq sot resmı jaýap berdi, dep habarlaıdy «Adyrna» tilshisi.
Biz atalǵan maqalada Almaty men Jetisý oblystary bólinip, oblys ortalyǵy Qonaev qalasyna kóshkeli beri memlekettik mekemelerdiń deni keńselerdi jalǵa alyp otyrǵanyn, máselen Almaty oblysynyń Sot ákimshiligi aldaǵy bar bolǵany bes aıǵa 2273,7 sharshy metrden kem emes aýqymdaǵy ákimshilik ǵımaratty (20 adamǵa deıin syıymdylyǵy bar zaly, 1 májilis zaly, vanna bólmeleri, 2 sot tóraǵasy, 3 alqa tóraǵalary, 20 sýdıaǵa arnalǵan kabınetteri bar) jaldaý úshin qazyna qarjysynan 50 752 232 teńge qarjy jumsaǵaly jatqanyn jazǵan edik.
Sondaı-aq, oblystyq sotqa resmı hat jazyp, oblys bólingen eki jyldan astam ýaqytta sot ákimshiligi ǵımarat jaldaýǵa bıýdjet qarjysynan qansha aqsha shyǵyndaǵanyn, bul úrdis qashanǵa deıin jalǵasatynyn, ǵımaratty jalǵa alýǵa ketken qarjymen memlekettik mekemege ǵımarat soǵyp alýǵa ne kedergi ekenin surap hat joldaǵanbyz.
Almaty oblystyq soty biz joldaǵan birneshe suraqqa qysqasha jaýap qaıyrypty. Qarańyz (hat mátinin ózgertpeı usynamyz):
“Almaty oblysy Qonaev qalasy áleýmettik-ekonomıkalyq damytýdyń 2023 – 2027 jyldarǵa arnalǵan keshendi josparyna sáıkes Almaty oblystyq soty men departamentine ǵımaratyn salý jergilikti atqarýshy organdarymen josparlanýda. Búgingi tańda, qala ákimdigi tarapynan Almaty-Óskemen avtomobıl jolynyń boıynda ornalasqan jer ýchaskeleri bólindi, olar boıynsha osy obektilerdiń qurylysy josparlanyp, "Almaty oblysynyń qurylys basqarmasy" men "Kompanııa STROITEKS" JShS jobalaý uıymy arasynda joǵaryda atalǵan obektiler boıynsha jobalaý-smetalyq qujattamany ázirleýge sharttar jasaldy. Jobalardy iske asyrý respýblıkalyq jáne jergilikti bıýdjet esebinen 2025-2026 jyldarǵa josparlanyp otyr. Jobalaý-smetalyq qujattamanyń aıaqtalý merzimi 2024 jylǵy 3-toqsan. Qazirgi ýaqytta jumys jobasyn ázirleý jumystary aıaqtalýda,-” delingen.
Qosh! Jaýaptan uqqanymyz Almaty oblystyq soty biz qoıǵan naqty suraqtardy aınalyp ótip, tek sot ǵımaratynyń 2027 jylǵa deıin áıteýir bir salynatynyn tilge tıek etipti. Oblys bólingen eki jyldyń ishinde ǵımarat jaldaýǵa qansha qarjy shyǵyn bolǵany týraly jaq ashpapty. Resmı jaýapta maqalada kóterilgen sot ǵımaratyn bes aıǵa jaldaýǵa bólingen 50 mıllıon teńgeden astam qarjy týraly da eshteńe aıtylmaǵan. Demek, oblystyq sot jaı ǵımarat úshin aınaldyrǵan bes aıǵa mıllıondardy shashyp jatqanyn joqqa shyǵarǵan joq!
2027 jylǵa deıin áli úsh jyl bar. Iaǵnı, 36 aı! Joǵarydaǵy 50 752 233 teńgeni beske bólseńiz 10 150 446 teńgeniń, sot ǵımaratyn aılyq jaldaý qunynyń tóbesi kórinedi. Demek, Almaty oblysynyń soty aldaǵy úsh jylda tek ǵımaratty jaldaý úshin halyq qazynasynan 365 416 070 teńge qarjy jumsaıdy degen sóz.
Biz oblysqa qatysty bir ǵana memlekettik mekemeniń jaǵdaıyn sóz etip otyrmyz. Almaty oblysynyń basqa mekemeleri bıýdjettiń qansha qarjysyn áýege shashyp jatqany belgisiz.
Asyl Abaı
Adyrna ulttyq portaly
