AQŞ-tyŋ Florida ştatynda tūratyn Skott Uinters OpenAI kompaniiasy men onyŋ bas direktory Sem Altmanǧa qarsy sotqa talap aryz berdı, dep habarlaidy "Adyrna" tılşısı.
CBS mälımetınşe, ol ChatGPT bergen densaulyqqa qatysty keŋesterdıŋ saldarynan därıgerge der kezınde qaralmai, keiın ökpe arteriiasynyŋ jappai tromboemboliiasyn ötkergenın mälımdedı.
Er adam talap aryzda 2025 jyly bas ainalu men qan qysymynyŋ jiı köterıluıne bailanysty ChatGPT-4o-dan keŋes sūraǧanyn jazǧan. Onyŋ sözınşe, chat-bot būl belgılerdı qauıptı dep baǧalamai, üide qalyp, arqasy şalqaiǧan kresloda köbırek demaluǧa keŋes bergen. Sondai-aq jaǧdai tek osyndai belgıler segız-on ret qaitalanǧan jaǧdaida ǧana alaŋdauǧa sebep bolatynyn aitqan.
Talapker osy keŋesterge süiengen. Alaida bırneşe aptadan keiın, 2025 jyldyŋ şıldesınde, ol ökpe arteriiasynyŋ jappai tromboemboliiasyn ötkerıp, ömırıne qauıp töngen.
Uinterstıŋ aituynşa, ony emdegen därıgerlerdıŋ bırı tromboemboliianyŋ damuyn ChatGPT ūsynǧan ūzaq uaqyt qozǧalyssyz otyrumen bailanystyrǧan.
Talapkerdıŋ advokattary mäsele tek qate keŋeste emes, chat-bottyŋ özın käsıbi därıger sekıldı senımdı türde ūstauynda dep esepteidı. Olardyŋ pıkırınşe, ChatGPT jalpy aqparat berudıŋ ornyna medisinalyq baǧalau jasap, emdeu jönınde ūsynys aityp, lisenziiasyz medisinalyq qyzmet körsetken.
Sonymen qatar talapkerler OpenAI-dy paidalanuşynyŋ dıni senımderın jauaptarynda orynsyz qoldandy dep aiyptady. Talap aryzda auruhanaǧa jetkızıler aldynda Uinters şat tūsyndaǧy auyrsynuǧa bailanysty qaitadan ChatGPT-den keŋes sūraǧany körsetılgen. Jauapta chat-bot: «Qūdai sızdıŋ deneŋızdı ünemı syrqattanatyndai etıp jaratqan joq» degen mazmūnda jauap bergen. Keiın būl auyrsynu ökpe arteriiasy tromboemboliiasynyŋ alǧaşqy belgılerınıŋ bırı bolǧany anyqtalǧan.
OpenAI aiyptaularmen kelıspeitının habarlady. Kompaniia ökılı Driu Pusateri ChatGPT därıgerdıŋ ornyn basuǧa arnalmaǧanyn jäne ony diagnoz qoiu nemese em taǧaiyndau qūraly retınde paidalanuǧa bolmaitynyn aitty.
Is boiynşa soŋǧy şeşımdı sot şyǧarady.
