AQŞ äskeri küşterı İrandaǧy bırqatar äskeri nysanǧa taǧy da äue soqqylaryn jasaǧanyn mälımdedı. Amerikalyq tarap būl ärekettı Ormuz būǧazy arqyly ötıp bara jatqan kommersiialyq kemege jasalǧan şabuylǧa jauap retınde tüsındırdı. Būl turaly VVS jazdy, dep habarlaidy “Adyrna”.
AQŞ Ortalyq qolbasşylyǧynyŋ (Centcom) mälımetınşe, Kipr tuy astynda jüzgen keme İrannyŋ İslam revoliusiiasy saqşylar korpusynyŋ (KSİR) şabuylyna ūşyraǧan. Pentagonnyŋ habarlauynşa, keme qozǧaltqyşy zaqymdanyp, jüzuın jalǧastyra almaǧan. Ekipaj müşelerınıŋ bırı ız-tüzsız joǧalǧan.
Öz kezegınde İran tarapy keme transponderın öşırıp, teŋız qatynasyna qauıp töndırgenın alǧa tartty. KSİR mälımdeuınşe, keme eskertu retınde oq atylǧannan keiın toqtatylǧan.
Oqiǧadan keiın KSİR Ormuz būǧazyn arnaiy habarlamaǧa deiın jabatynyn jariialap, AQŞ aimaqtaǧy aralasuyn toqtatpaiynşa būl şeşım özgermeitının mälımdedı. Sonymen qatar İran AQŞ-tyŋ äskeri äreketterıne qataŋ jauap beretının eskerttı.
AQŞ soqqylarynan keiın İran aimaqtaǧy amerikalyq odaqtastarǧa baǧyttalǧan şabuyldaryn qaita bastady. İran äskerı Katar, Kuveit, İordaniia jäne Bahreindegı AQŞ äskeri bazalaryna soqqy jasaǧanyn habarlady. Sonymen bırge Oman portyndaǧy amerikalyq küşter paidalanǧan nysandarǧa da şabuyl jasalǧany aityldy.
Centcom mälımetınşe, AQŞ-tyŋ soŋǧy operasiiasy barysynda İrandaǧy şamamen 140 äskeri nysanaǧa soqqy jasalǧan. Olardyŋ qatarynda zymyran jäne ūşqyşsyz ūşu apparattary baǧdarlamasyna qatysty obektıler, äskeri-teŋız infraqūrylymy, oq-därı qoimalary, bailanys jüielerı men jaǧalaudaǧy baqylau beketterı bar.
İran bilıgınıŋ mälımetınşe, osy aptada jasalǧan AQŞ soqqylary saldarynan 17 adam qaza tauyp, 115 adam jaralanǧan.
AQŞ prezidentı Donald Tramp Vaşington men Tegeran arasyndaǧy bıtımnıŋ küşın joiǧanyn mälımdedı. Al İrannyŋ syrtqy ıster ministrı Abbas Aragchi AQŞ-ty kelısım talaptaryn būzdy dep aiyptady. Soǧan qaramastan amerikalyq tarap İranmen kelıssözderdı jalǧastyru mümkındıgın joqqa şyǧarǧan joq.
Sonymen qatar İrannyŋ jaŋadan taǧaiyndalǧan Joǧarǧy köşbasşysy Modjtaba Hamenei alǧaşqy ündeuınde äkesı Äli Hameneidıŋ ölımı üşın kek aluǧa uäde berdı.
