“Sizdiń saparyńyz strategııalyq yntymaqtastyqty nyǵaıtýǵa tyń serpin berý turǵysynan óte mańyzdy. Qaýipsizdik, energetıka, saýda jáne ınvestıııa sekildi mańyzdy strategııalyq salalardaǵy senimdi ári uzaqmerzimdi seriktestik qatynastarymyz óte jaqsy. Sondyqtan biz bul yntymaqtastyqty odan ári damytýǵa daıynbyz. Osy múmkindikti paıdalana otyryp, Qurama Shtattardyń táýelsizdigimizdi, aýmaqtyq tutastyǵymyz ben egemendigimizdi turaqty túrde berik qoldap kele jatqany úshin rızashylyǵymdy bildirgim keledi”, – dedi Prezıdent.
Memleket basshysy ekonomıkalyq yntymaqtastyq jóninde aıta kele, AQSh Qazaqstannyń 62 mıllıard dollardan astam ınvestıııa quıǵan iri ınvestorlardyń biri ekenin atap ótti.
Qasym-Jomart Toqaev Ortalyq Azııa elderi men AQSh-tyń syrtqy saıası vedomstvolary jetekshileri kezdesýiniń Astanada ótýi mańyzdy ekenin atap ótip, Qurama Shtattardyń S5+1 formatyndaǵy yntymaqtastyqty nyǵaıtýǵa baǵyttalǵan kúsh-jigerin quptady.
Óz kezeginde AQSh-tyń Memlekettik hatshysy qonaqjaılyq kórsetkeni úshin Qasym-Jomart Toqaevqa alǵys aıtyp, AQSh Prezıdentiniń sálemin jetkizdi.
“30 jyldan astam ýaqyt ishinde qol jetkizgen eleýli tabystardy ekijaqty deńgeıde damytý, seriktestigimizdi tereńdetý jáne nyǵaıtý mańyzdy. Tek sońǵy jyldary biz osy baǵytta mańyzdy ári jańa jetistikterge qol jetkizdik. Bizdiń qarym-qatynastarymyz berik jáne baılanystarymyz kúsheıe túsedi. Biz osy baǵyttan aınymaımyz. Sonymen qatar búgin Astanada Ortalyq Azııadaǵy seriktesterdiń basyn qosqanyńyz úshin Sizge jáne Sizdiń ujymyńyzǵa alǵys aıtamyz. Áriptesterimiz – syrtqy ister mınıstrlerimen birge aımaqty biriktirýge baǵyttalǵan berik ári tyǵyz qarym-qatynas jasaý, naqty máselelerge nazar aýdarý jónindegi jumystarǵa atsalysamyz dep úmittenemin. Bul Ortalyq Azııa halyqtary men Amerıka Qurama Shtattaryna paıdaly bolady dep oılaımyn. Biz eń joǵary deńgeıde ózara is-áreket jasaýǵa nıettimiz. Men osynda kelgenime jáne yntymaqtastyǵymyzdy nyǵaıtýǵa óz úlesimdi qosqanyma óte qýanyshtymyn”, – dedi Entonı Blınken.
Sonymen qatar Amerıka dıplomaty Qazaqstandaǵy saıası jáne ekonomıkalyq ózgeristerge joǵary baǵa berdi.
