“Sızdıŋ saparyŋyz strategiialyq yntymaqtastyqty nyǧaituǧa tyŋ serpın beru tūrǧysynan öte maŋyzdy. Qauıpsızdık, energetika, sauda jäne investisiia sekıldı maŋyzdy strategiialyq salalardaǧy senımdı ärı ūzaqmerzımdı serıktestık qatynastarymyz öte jaqsy. Sondyqtan bız būl yntymaqtastyqty odan ärı damytuǧa daiynbyz. Osy mümkındıktı paidalana otyryp, Qūrama Ştattardyŋ täuelsızdıgımızdı, aumaqtyq tūtastyǧymyz ben egemendıgımızdı tūraqty türde berık qoldap kele jatqany üşın rizaşylyǧymdy bıldırgım keledı”, – dedı Prezident.
Memleket basşysy ekonomikalyq yntymaqtastyq jönınde aita kele, AQŞ Qazaqstannyŋ 62 milliard dollardan astam investisiia qūiǧan ırı investorlardyŋ bırı ekenın atap öttı.
Qasym-Jomart Toqaev Ortalyq Aziia elderı men AQŞ-tyŋ syrtqy saiasi vedomstvolary jetekşılerı kezdesuınıŋ Astanada ötuı maŋyzdy ekenın atap ötıp, Qūrama Ştattardyŋ S5+1 formatyndaǧy yntymaqtastyqty nyǧaituǧa baǧyttalǧan küş-jıgerın qūptady.
Öz kezegınde AQŞ-tyŋ Memlekettık hatşysy qonaqjailyq körsetkenı üşın Qasym-Jomart Toqaevqa alǧys aityp, AQŞ Prezidentınıŋ sälemın jetkızdı.
“30 jyldan astam uaqyt ışınde qol jetkızgen eleulı tabystardy ekıjaqty deŋgeide damytu, serıktestıgımızdı tereŋdetu jäne nyǧaitu maŋyzdy. Tek soŋǧy jyldary bız osy baǧytta maŋyzdy ärı jaŋa jetıstıkterge qol jetkızdık. Bızdıŋ qarym-qatynastarymyz berık jäne bailanystarymyz küşeie tüsedı. Bız osy baǧyttan ainymaimyz. Sonymen qatar bügın Astanada Ortalyq Aziiadaǧy serıktesterdıŋ basyn qosqanyŋyz üşın Sızge jäne Sızdıŋ ūjymyŋyzǧa alǧys aitamyz. Ärıptesterımız – syrtqy ıster ministrlerımen bırge aimaqty bırıktıruge baǧyttalǧan berık ärı tyǧyz qarym-qatynas jasau, naqty mäselelerge nazar audaru jönındegı jūmystarǧa atsalysamyz dep ümıttenemın. Būl Ortalyq Aziia halyqtary men Amerika Qūrama Ştattaryna paidaly bolady dep oilaimyn. Bız eŋ joǧary deŋgeide özara ıs-äreket jasauǧa niettımız. Men osynda kelgenıme jäne yntymaqtastyǧymyzdy nyǧaituǧa öz ülesımdı qosqanyma öte quanyştymyn”, – dedı Entoni Blinken.
Ūqsas jaŋalyqtar
