OPEK+ ūiymyna müşe jetı el 2026 jyldyŋ tamyzynda mūnai öndıru kölemın täulıgıne 188 myŋ barrelge arttyru turaly kelısımge keldı, dep habarlaidy «Adyrna» tılşısı.
Olardyŋ qatarynda Qazaqstan, Saud Arabiiasy, Resei, İrak, Kuveit, Aljir jäne Oman bar.
Būl şeşım 2023 jyldyŋ säuırınde engızılgen erıktı öndırıstık şekteulerden kezeŋ-kezeŋımen bas tartu aiasyndaǧy kezektı qadam bolmaq.
Jariialanǧan kestege säikes, Qazaqstanda mūnai öndıru kölemı täulıgıne 10 myŋ barrelge ūlǧaitylady. Osylaişa el üşın belgılengen öndırıs deŋgeiı täulıgıne 1,618 million barreldı qūraidy.
OPEK+ aldaǧy şeşımder mūnai naryǧyndaǧy jaǧdaiǧa bailanysty qabyldanatynyn atap öttı. Qajet bolǧan jaǧdaida elder öndırıstı arttyru qarqynyn jedeldete alady nemese būl üderıstı uaqytşa toqtatyp, tıptı kerı qaitaruy mümkın. Sondai-aq kelısımge qatysuşy memleketter öz mındettemelerın oryndaudy jalǧastyryp, 2024 jyldyŋ qaŋtarynan berı kelısılgen kvotadan artyq öndırılgen mūnai kölemın öteuge uaǧdalasty.
Taraptar mūnai naryǧyndaǧy jaǧdaidy baǧalau üşın ai saiyn kezdesuler ötkızu turaly da kelısımge keldı. OPEK+ ūiymynyŋ kelesı otyrysy 2026 jylǧy 2 tamyzda ötedı.
