Mausym aiynda jariialanǧan Global Peace Index reitingınıŋ jaŋartylǧan nūsqasynda Özbekstan Ortalyq Aziiadaǧy eŋ qauıpsız el dep tanyldy, dep habarlaidy «Adyrna» tılşısı Ferǧanaǧa sılteme jasap.
Reitingtı ştab-päterı Avstraliiada ornalasqan täuelsız halyqaralyq analitikalyq ortalyq — Ekonomika jäne beibıtşılık institutynyŋ mamandary jasaǧan.
163 el qamtylatyn eŋ beibıt memleketter tızımın qūrastyru kezınde üş negızgı baǧyt eskerılgen: ışkı jäne syrtqy qaqtyǧystar, äleumettık qauıpsızdık pen qorǧalu deŋgeiı, militarizm. Sonymen qatar 23 körsetkış taldanǧan. Olardyŋ ışınde körşıles eldermen qarym-qatynas, halyq ışındegı bosqyndar ülesı, saiasi tūraqsyzdyq, qoǧamdyq tärtıp, qylmys statistikasy, küştık qūrylymdardaǧy qyzmetkerler sany, äskerge jūmsalatyn şyǧyndar jäne basqa da faktorlar bar.
Jaŋa tızımde Özbekstan 1,728 ball jinap, 37-orynǧa köterıldı. El byltyrǧy indeksımen salystyrǧanda 10 satyǧa joǧarylaǧan. Ötken jylǧy öŋırlık köşbasşy — Qazaqstan — Ortalyq Aziia elderı ışınde ekınşı orynǧa tüstı. Jahandyq reitingte ol 1,771 ballmen 44-orynǧa jaiǧasty. Odan keiıngı orynda Täjıkstan tūr. El 1,799 ball nätijesımen 47-oryndy ielengen. Qyrǧyzstan 8 satyǧa köterılgenıne qaramastan, 1,865 ballmen 61-orynda qaldy.
Al Ortalyq Aziiadaǧy postkeŋestık respublikalar ışınde eŋ tömen körsetkış Türkımenstanǧa tiesılı. Būl el 1,903 ball alyp, älemdık reitingte 66-orynnan körındı.
Aita keteiık, 2025 jylǧy reitingte Ortalyq Aziia boiynşa Qazaqstan köş bastaǧan edı. Elımız 56-orynda bolǧan. Al Özbekstan 67-orynda, Qyrǧyzstan 78-orynda, Täjıkstan 79-orynda, Türkımenstan 87-orynda tūrǧan.
Jaŋartylǧan tızımnıŋ alǧaşqy oryndarynda aitarlyqtai özgerıs joq. Jyl saiyn dästürlı türde Europa elderı men aral memleketterı alda keledı. Ekınşı jyl qatarynan İslandiia (1,161 ball) köş bastap tūr. Odan keiıngı bestıkke Jaŋa Zelandiia, Şveisariia, Sloveniia jäne İrlandiia engen.
Soŋǧy orynda da özgerıs joq. 3,367 ball jinaǧan Resei 163-orynda tūr. Ol 2022 jyly Ukrainaǧa qarsy soǧys bastap, älı künge deiın körşı el aumaǧynda äskeri qimyldar jürgızıp keledı.
