Oral qalasynda 96 jastaǧy tyl ardagerı Sandeş Japaşeva Jeŋıs künıne arnalǧan qūttyqtau men 50 myŋ teŋge kölemındegı bırjolǧy tölemdı ala almai qalǧan, dep habarlaidy "Adyrna" ūlttyq portaly KTK arnasyna sılteme jasap.
Mälımetke säikes, zeinetker elektrondy bazadan joǧalyp ketıp, tırkeuden de şyǧyp qalǧan. Sandeş Japaşeva ūzaq jyldar mektep direktory bolyp qyzmet atqarǧan. Ol Eŋbek Qyzyl Tu ordenımen marapattalǧan, bılım beru ısınıŋ üzdıgı jäne Qazaq KSR Joǧarǧy keŋesınıŋ būrynǧy deputaty bolǧan. Ardagerdıŋ tuystary män-jaidy anyqtau üşın Azamattarǧa arnalǧan ükımet memlekettık korporasiiasynyŋ halyqqa qyzmet körsetu ortalyǧyna jügıngen. Mamandar būl jaǧdaidy tehnikalyq aqaumen bailanystyrǧan.
Tuystarynyŋ aituynşa, ardagerdıŋ merekede nazardan tys qaluy oǧan auyr tigen.
«Bız üşın būl 50 myŋ teŋge maŋyzdy emes. Mäsele – äjemızdı eşkım kelıp qūttyqtamaǧanynda. Soǧan qatty köŋılı tüsıp kettı», – dedı nemeresı Ernar Äldekeşev.
Al tölemge jauapty mekeme ökılderı būǧan deiın tızımder buhgalteriia arqyly jasalsa, qazır memlekettık aqparattyq jüielerdegı derekter negızınde qalyptastyrylatynyn mälımdedı. Alaida Sandeş Japaşevanyŋ esımı jüieden tabylmaǧan.
Qala äkımdıgınıŋ mälımetınşe, ardagerdıŋ tırkeuı 9 mamyrdan keiın ǧana qaita räsımdelgen. Sonyŋ saldarynan ol merekelık tölem aluşylar tızımıne enbei qalǧan.
