Aqmola oblysynda 2026 jyly üş ırı ekologiialyq park aşu közdelıp otyr. Qazırgı taŋda jobalar Zerendı, Aqköl jäne Selinograd audandarynda kezeŋ-kezeŋımen jüzege asyryluda.
Oblystyq turizm basqarmasynyŋ baspasöz hatşysy Äsem Mūqymovanyŋ mälımetınşe, ekoparkterdıŋ bırı Zerendı audanynda ornalasqan demalys aimaǧy negızınde qalyptasyp, bügınde keluşılerge esıgın aiqara aşqan. Kökşetau qalasynan nebärı 50 şaqyrym qaşyqtyqta ornalasuy nysandy qysqa merzımdı demalys üşın qolaily orynǧa ainaldyryp otyr. Aumaǧy Zerendı kölı men «Kökşetau» memlekettık ūlttyq tabiǧi parkımen şektesetındıkten, mūndaǧy turistık äleuet joǧary baǧalanuda. Joba aiasynda ekologiialyq turizm men belsendı demalys baǧyttary damytylyp, jaiau jäne velojoldar, sport alaŋdary, sondai-aq şaŋǧy-rollerlık trassa qarastyrylǧan.
Bügınde demalys aimaǧynda infraqūrylymdyq jūmystar jürgızılıp, sändık kıreberıs arka, oryndyqtar men qoqys jäşıkterı ornatylǧan, jaryqtandyru jüiesı ıske qosylǧan. Sonymen qatar ätkenşekter, fotozona, vorkaut jäne sport alaŋdary paidalanuǧa berılgen. Aldaǧy uaqytta turistık soqpaqtardy abattandyru jäne «Smolnaia» şoqysyna qarau alaŋyn salu josparlanyp otyr.
Aqköl audanynda da ekoturizm baǧytyndaǧy auqymdy joba jüzege asyryluda. 60 gektar aumaqty qamtityn ekopark «Wyndham Residence Aqkol» qonaqüi keşenı janynan damyp keledı. Astana qalasynan şamamen 120 şaqyrym qaşyqtyqta ornalasqan būl aumaq elorda tūrǧyndary üşın de qoljetımdı demalys orny bolmaq. Joba şeŋberınde glemping aimaqtary, qonaq üiler, jaiau jäne velojoldar, sondai-aq emdık-sauyqtyru baǧytyndaǧy infraqūrylym qarastyrylǧan.
Qazırgı uaqytta mūnda seruen baǧyttary qalyptastyrylǧan. Būdan bölek, ekologiialyq taza materialdardy paidalana otyryp bes turistık soqpaq salu, oryndyqtar men baǧyttauşy belgıler ornatu, mümkındıgı şekteulı azamattarǧa arnalǧan taktildı jolaqtar jasau josparlanuda. Jobany tolyq aiaqtau merzımı biylǧy jyldyŋ 1 tamyzy dep belgılenıp otyr.
Selinograd audanyndaǧy «BalQaragai» demalys aimaǧy da ekopark retınde qaita jaŋǧyryp keledı. 55 gektar aumaqty qamtityn būl keşen Astanaǧa jaqyn ornalasuynyŋ arqasynda otbasylyq jäne qysqa merzımdı turizm üşın tartymdy orynǧa ainalmaq. Mūnda demalys pen tabiǧatty tamaşalauǧa arnalǧan aimaqtarmen qatar sporttyq-oiyn-sauyq infraqūrylymy da jūmys ıstep tūr: etnoauyl, akvapark, sport alaŋdary, atpen seruendeu manejı, balalar alaŋdary men özge de nysandar bar.
Joba aiasynda qosymşa turistık soqpaqtar men at marşruttaryn damytu, kemping alaŋyn qūru jäne velojoldar salu josparlanǧan.
Oblysta ekoturizmdı damytu tek demalys oryndarymen şektelmei, jaŋa turistık baǧyttardy qalyptastyrumen de ūştasyp otyr. Sonyŋ ışınde sakraldy jäne tarihi-mädeni nysandarǧa baǧyttalǧan marşruttardy damytuǧa basymdyq berılgen. Burabai öŋırınıŋ tarihi-arheologiialyq äleuetın aşu da kün tärtıbınde tūr.
Vedomstvo ökılınıŋ aituynşa, 2024 jyldan berı jürgızılgen arheologiialyq zertteuler nätijesınde bırqatar qūndy nysandar anyqtalǧan. Solardyŋ negızınde aldaǧy mausymda jaŋa turistık baǧyttar ıske qosylady dep kütılude. Atap aitqanda, «mūrtty qorǧandar» siiaqty köne eskertkışterdı qamtityn marşruttar jeke investisiialar esebınen de damytylmaq.
«Turisterge öŋırdıŋ bai tarihy men mädeni mūrasyn keŋınen tanystyruǧa baǧyttalǧan arnaiy ekskursiialar ūsynylady», - dedı Äsem Mūqymova.
Aita keteiık, qazırgı taŋda «Kökşetau» memlekettık ūlttyq tabiǧi parkınde jalpy ūzyndyǧy 180 şaqyrymnan asatyn 27 turistık baǧyt jūmys ıstep tūr.
Jalpy josparǧa säikes, 2028 jylǧa deiın Aqmola oblysynda jetı ekopark qūru közdelgen. Būl bastama öŋırdı elımızdegı ekoturizmnıŋ maŋyzdy ortalyqtarynyŋ bırıne ainaldyruǧa baǧyttalyp otyr.
