12 säuırde QHR töraǧasy Si Szinpin Pekinge jūmys saparymen barǧan Täjıkstan prezidentı Emomali Rahmonmen kelıssözder ötkızdı, dep habarlaidy «Adyrna» tılşısı.
Taraptar jasyl energetika, aqyldy qalalar, jasandy intellekt, sondai-aq terrorizm men separatizmge qarsy küres salalaryndaǧy bırlesken jūmysty talqylady. Qytai köşbasşysy öŋırlık tūraqtylyqty saqtau üşın bırlesıp äreket etudıŋ maŋyzdylyǧyn atap öttı. Sonymen qatar ol Rahmondy Täjıkstan täuelsızdıgınıŋ 35 jyldyǧymen jäne memleket qūrudaǧy jetıstıkterımen qūttyqtady.
Emomali Rahmon Täjıkstan men Qytai arasyndaǧy strategiialyq ärıptestıktıŋ ärtürlı baǧyttarda tereŋdep kele jatqanyn mälımdedı. Aituynşa, auyl şaruaşylyǧy salasynda bırlesken jobalar jüzege asyrylyp, mädeni almasu damyp keledı. Būl ekı el halyqtaryna da paida äkelıp otyrǧanyn atap öttı. Sondai-aq ol Duşanbe tarapynyŋ Taivan mäselesıne qatysty ūstanymyn rastap, Täjıkstannyŋ «bır Qytai» qaǧidatyn berık qoldaitynyn jetkızdı.
Kelıssöz qorytyndysy boiynşa ekı el basşysy Qytai Halyq Respublikasy men Täjıkstan Respublikasy arasyndaǧy «Mäŋgı tatu körşılık, dostyq jäne yntymaqtastyq turaly şartqa» jäne «Jaŋa däuırdegı jan-jaqty strategiialyq serıktestıktı tereŋdetu turaly bırlesken mälımdemege» qol qoidy. Sondai-aq taraptar partiiaaralyq bailanystar, ekonomika, sauda, investisiia, jasandy intellekt, jasyl ken öndırısı jäne BAQ salalaryn qosa alǧanda, onnan astam yntymaqtastyq qūjattaryna qol qoiu räsımıne qatysty. Būǧan qosa auyl şaruaşylyǧy, mädeniet, bılım, tūrǧyn üi qūrylysy, tauar inspeksiiasy jäne naryqty qadaǧalau siiaqty salalar boiynşa da bırqatar kelısımder jasaldy.
Sondai-aq Täjıkstan prezidentı Qytaiǧa jasaǧan memlekettık sapary aiasynda Beijıŋ universitetıne bardy. Onda oǧan osy joǧary oqu ornynyŋ "qūrmettı professory" ataǧy berılıp, saltanatty türde ǧylymi därejenı bıldıretın qola taqta tabys etıldı. Universitet rektory Gun Sihuan ǧylymi keŋestıŋ şeşımın tanystyryp, Emomali Rahmonǧa "qūrmettı professor" ataǧy «Täjıkstan men Qytai arasyndaǧy dostyq pen yntymaqtastyqty nyǧaituǧa qosqan ülesı, ǧylymi, gumanitarlyq jäne mädeni bailanystardy damytuǧa, sondai-aq su jäne klimat salasyndaǧy jahandyq bastamalardy ılgerıletuge qosqan erekşe eŋbegı üşın» berılgenın atap öttı.
Emomali Rahmonnyŋ Qytaiǧa būl sapary – onyŋ 23-şı resmi sapary. Būǧan deiın ol 2025 jyldyŋ tamyz–qyrküiek ailarynda ŞYŪ sammitıne jäne Qytai halqynyŋ japon basqynşylaryna qarsy soǧysyndaǧy Jeŋıstıŋ 80 jyldyǧyna arnalǧan saltanatty ıs-şaralarǧa qatysu üşın kelgen bolatyn.
2025 jyldyŋ qaŋtar–qazan ailary aralyǧynda ekı el arasyndaǧy sauda kölemı 3,5 milliard dollardan asyp, jyldyq esepte şamamen 8 paiyzǧa ösken. Ekı memleket bılım jäne mädeniet salalarynda da tyǧyz yntymaqtastyq ornatqan.
Emomali Rahmonnyŋ Täjıkstannyŋ joǧarǧy bilıgıne kelgenıne 33 jyldan asty.
