Ahmet Baitūrsynūly atyndaǧy Qostanai öŋırlık universitetı studentterı 100 km/saǧ jyldamdyqqa üş sekundta jetetın jarys bolidın äzırledı, dep habarlaidy "Adyrna" ūlttyq portaly.
Joba ekı jyl ışınde jüzege asyrylǧan.
Būl turaly Qazaqstan Respublikasynyŋ ǧylym jäne joǧary bılım ministrlıgı habarlady. Mälımetke säikes, äzırleme tolyqtai oqu orny bazasynda oryndalǧan. Joba ideiadan bastap jobalau, bölşekterdı daiyndau jäne qūrastyru kezeŋderın qamtyǧan.
Jūmys Maşina jasau salasyndaǧy ozyq tehnologiialar ortalyǧynda jürgızıldı. Är bölşek aldymen sifrlyq formatta modeldenıp, kompiuterlık synaqtan ötkızılgen. Synaq nätijelerı oŋ bolǧan jaǧdaida ǧana öndırıs kezeŋıne jıberılgen.
Bolid avtokölık salasynyŋ ökılderı qatysqan şarada tanystyryldy. Jobaǧa serıktes ūiymdar da tartylyp, bölşekterdı öŋdeu men şeteldık komponentterdı jetkızuge qoldau körsetken.
Universitet rektory Seiıtbek Quanyşbaev jobanyŋ bastamasy 2023 jyldyŋ basynda köterılgenın mälımdedı. Joba avtorlary äzırlemenı Formula Student halyqaralyq injenerlık baiqauynda ūsynudy josparlap otyr.
