AQŞ-tyŋ Niu-Iork qalasyndaǧy älemge äigılı Times Square alaŋynda Nauryz merekesıne arnalǧan mädeni ıs-şara öttı. Köktemnıŋ jaŋaruyn, bereke men bırlıktı bıldıretın ūlttyq meiramdy ūlyqtauǧa jinalǧan jūrtşylyq qazaqtyŋ dästürı men önerıne kuä boldy.
Merekelık baǧdarlama aiasynda «Älqissa» dombyra studiiasynyŋ önerpazdary sahnaǧa şyǧyp, ūlttyq muzykalyq mūrany tanystyrdy. Qos ışektıŋ ünı megapolistıŋ qaq ortasynda şyrqalyp, jinalǧan körermenderdıŋ erekşe yqylasyna bölendı. Dombyramen oryndalǧan küiler men änder qazaq mädenietınıŋ bailyǧy men tereŋdıgın aiqyn körsettı.
Is-şara barysynda önerpazdar halyq arasynda keŋınen tanymal «Sarjailau» änın oryndady. Äuezdı än alaŋǧa jinalǧan köpşılıktıŋ köŋıl küiın köterıp, Nauryzdyŋ şattyqqa toly ruhyn sezınuge mümkındık berdı. Körermender önerpazdardy ūzaq qol soǧyp, jyly qabyldady.
Ūiymdastyruşylardyŋ aituynşa, mūndai mädeni şaralardyŋ basty maqsaty – qazaqtyŋ salt-dästürı men ūlttyq önerın şetelde nasihattau, sondai-aq türlı etnos ökılderı arasyndaǧy mädeni bailanystardy nyǧaitu. Times Square siiaqty älem nazaryn audaratyn alaŋda Nauryzdy atap ötu Qazaqstan mädenietınıŋ halyqaralyq deŋgeide tanyluyna yqpal etedı.
Soŋǧy jyldary Nauryz meiramy şeteldegı qazaq diasporasy arasynda da keŋınen toilanyp keledı. Äsırese AQŞ-tyŋ ırı qalalarynda ūiymdastyrylatyn konsertter, körmeler men ūlttyq taǧamdar festivalderı būl merekege degen qyzyǧuşylyqtyŋ artyp otyrǧanyn körsetedı.
Niu-Iork törınde ötken būl şara da köktemnıŋ keluın ǧana emes, halyqtar arasyndaǧy dostyq pen mädeni almasudyŋ maŋyzyn aiqyndai tüstı. Qazaqtyŋ küiı men änı älemnıŋ eŋ qarbalas alaŋdarynyŋ bırınde şyrqalyp, ūlttyq önerdıŋ şekara tanymaitynyn taǧy bır märte däleldedı.
