Osydan bir eki kún buryn áıgili ánshi Dımash Qudaıbergendi qyrǵyzdyń balasy, urpaǵy degen qaýesetter tarady. Ákesi jaýap berdi, dep habarlaıdy "Adyrna" ulttyq portaly.
Ákesiniń áńgimesine qulaq salsaq:
"Ájem Rahımanyń rýy Álimniń ishindegi - Jaqaıym, onyń ishinde - Bylamyq. Ol kisi boıjetip, Jaqaıym rýynyń ishindegi Talpaq, Qyrǵyz rýynyń jıeni Tóleýbaı degen kisige turmysqa shyǵady. Ekeýi birneshe bala súıedi.
Sóıtip júrgende otyzynshy jyldardyń alasapyrany bastalady. Ashtyqtyń kezinde Tóleýbaı atamyz ólip, ájemiz bala-shaǵasyn ashtan ólip qalmas úshin ýaqytsha balalar úıine ótkizip, alasapyran zamanda olardan kóz jazyp qalady.
Aýylda aman qalǵan úlkender aqyldasa otyryp, súıener tireginen, bala-shaǵasynan tirideı aıyrylǵan qam kóńil Rahıma ájemdi Álimge sińgen qyrǵyz rýynyń ishindegi Baraq, onyń ishindegi Tileýbaıdan taraıtyn, jubaıy qaıtys bolǵan meniń atam Aıtbaıǵa qosady.
Jan-jaqtaǵy aǵaıyn-týystyń súıemeldeýimen eki jarty bir bútin bolyp, tútin tútetedi. Kóp uzamaı ómirge meniń ákem keledi. Anadaı jaǵdaılardan keıin dúnıege kelgen bala tipti tátti kórinedi ǵoı, ekeýi de: «Bizge bul balany Qudaı berdi...» dese kerek.
Sóıtip, eki shańyraqtyń óshken otyn tutatqan sábıge Qudaıbergen degen esim beriledi. Ákemiz 7-8 jasqa kelgende, taǵy bir qýanyshty jaǵdaı bolypty. Ájemniń Tóleýbaıdan týǵan Aıazbaı degen uly aman tabylady. Aıtbaı atam toı jasap, baýyryna basqan. Aıazbaı da meıirimdi, elgezek bozbala eken, lezde atama baýyr basady. Meniń ákem Qudaıbergendi erkeletip, ertip júredi eken.
Bir kúni Aıtbaı atam attan qulap, mertigedi. Derti ábden meńdep, ómirden ozar aldynda uly Aıazbaıdy shaqyryp alyp:
"Balam, estııar jigit bolyp qaldyń, meniń ýaqytym taıaǵan sııaqty, iniń Qudaıbergen ózińe amanat, eshqashan bólinbeńder, saǵan sendim..." dep úzilip júre beripti. Keıinirek anasy da ómirden ozypty. Atamyz qaıtqan kezde meniń ákem Qudaıbergen bar bolǵany toǵyz jasta eken.
Áke amanatyna berik Aıazbaı atamyz inisi Qudaıbergendi jetelep júrip ósirip, Baraqtyń Tileýbaıynan, Jaqaıymnyń Talpaǵynan taraıtyn barlyq týys, týǵannyń meıirimin boıyna teń sińiredi. Ákem Jaqaıym men Baraqtyń ortaq balasy bolyp er jetedi.
Ásker qatarynan kelgen soń, aǵasynyń aq batasyn alyp ákem Almaty aýylsharýashylyq ınstıtýtyna oqýǵa túsedi.
Oqyp júrip, Aqtóbeniń Shalqar óńirinen kelgen, Álimniń Shektisinen taraıtyn Qabaqtyń qyzy, meniń anam Mıýamen tanysyp, shańyraq kóteredi.
Ekeýinen úsh bala órbidik - men, ápkem Gúlzıra, qaryndasym Nurgúl.
Men 1993 jyly ınstıtýt bitirip, Álimniń Shektisinen, onyń ishinde Nazar rýynyń Básheninen taraıtyn Ermekqyzy Svetamen shańyraq kóterdim.
Allaǵa shúkir, qazir eki ulymyz, bir qyzymyz bar.
Ata-anamyzben birge bir shańyraq astynda tatý-tátti ómir súrip jatyrmyz.
P.S.
Alataýdyń baýyryn mekendegen qyrǵyz ultyna qatysymyz joq.
Qudandaly, jekjatty bolar kezde ǵana aıtylatyn rý tarmaqtaryn, ómir tarıhyn jarııaly túrde baıandaýǵa májbúr etken "jýrnalısterge" ne deıin..., - dedi Dımashtyń ákesi Kanat Aıtbaev.
"Adyrna" ulttyq portaly
