Almatyda ǧalym-fizik, akademik Aisūltan Qalybaev 80 jasqa qaraǧan şaǧynda ömırden ozdy, dep habarlaidy "Adyrna" ūlttyq portaly 24.kz arnasyna sılteme jasap.
Aisūltan Qalybaevtyŋ esımı Qazaqstannyŋ ǧaryş salasyndaǧy jetıstıkterımen tyǧyz bailanysty. 1990-jyldardyŋ ortasynda ol Ūlttyq aeroǧaryş agenttıgın basqardy jäne qazaqstandyq ǧaryşker Talǧat Mūsabaevtyŋ «Mir» orbitalyq stansiiasyna jasaǧan ekı ūşu baǧdarlamasyna jetekşılık ettı.
Aisūltan Abdullaūly äl-Farabi atyndaǧy Qazaq ūlttyq universitetı fizika fakultetınıŋ tülegı. Onyŋ ǧylymi baǧyty aspan mehanikasy men ǧaryştyq ūşu dinamikasyna arnalǧan. Alǧaşqy dissertasiiasyn 1979 jyly qorǧap, Jer poliusterınıŋ qozǧalysyn zerttegen. Keiın zymyran qozǧaltqyştarynyŋ tiımdılıgın arttyru mäselelerımen ainalysty.
Ǧalym matematika, nanotehnologiia jäne qorǧanys önerkäsıbı salalarynda ırgelı eŋbekter jazǧan. Ol 100-den astam ǧylymi jūmys pen 30-ǧa juyq patenttıŋ avtory, onyŋ ışınde halyqaralyq deŋgeidegı patentterı bar. Sonymen qatar, älemnıŋ bırqatar jetekşı universitetterınıŋ qūrmettı professory atanǧan.
Marqūmmen qoştasuǧa ärıptesterı, dostary jäne şäkırtterı jinaldy.
