Ündıstannyŋ Chennai qalasynda ötıp jatqan Düniejüzılık şahmat olimpiadasynyŋ jetınşı turynda qazaqstandyqtar İspaniiany jeŋdı. Būl nätije bızdıŋ komandany Armeniia qūramasy bastaǧan köşbasşylar qataryna qosyluǧa kömektestı, dep habarlaidy “Adyrna” ūlttyq portaly.
Elımızdıŋ erler qūramasy bastapqy kestede 40-orynǧa tūraqtady, alaida 7-şı turdyŋ qorytyndysy boiynşa 4-şı oryndy iemdengen İspaniiany 2,5:1,5 esebımen ūtty.
Är oiynda reitingtegı aiyrmaşylyq ispandyq şahmatşylardyŋ paidasyna şamamen 100-200 ūpai bolǧanymen, qazaqstandyqtar kezdesude sensasiialyq jeŋıske jettı. Osylaişa, erler qūramasy osymen turnirde qatarynan besınşı oiyndy öz paidasyna şeştı.
Nätijesınde Qazaqstan qūramasy 7-şı turdyŋ soŋynda 7-şı orynǧa jaiǧasty.
Äielder qūramasy 7-şı turda Vetnam qūramasyn 2,5-1,5 esebımen jeŋıp, jalpy reitingte 10-şy orynda tūr.
Aita keteiık, 28 şıldede Ündıstannyŋ Chennai qalasynda 44-şı Düniejüzılık şahmat olimpiadasy bastaldy. 186 eldıŋ ökılderı qatysatyn jarys 10 tamyzǧa deiın jalǧasady.
“Adyrna” ūlttyq portaly
