Premer-ministrdıŋ orynbasary Qanat Bozymbaev Mäjılıs deputatynyŋ saualyna bergen jauapta surrogat ana qyzmetın retteitın zaŋnama qai baǧytta jetıldırıletının mälım ettı, dep habarlaidy "Adyrna".
"Qoldanystaǧy zaŋnama boiynşa, qazır Qazaqstan Respublikasynyŋ azamattary da, şetel azamattary da surrogat ana qyzmetıne tapsyrys bere alady. Is jüzınde halyqaralyq surrogat ana bolu jaǧdailarynda türlı qaqtyǧystar men sot prosesterı tuyndai bastady. Osyǧan bailanysty Qazaqstan Respublikasynyŋ aumaǧynda surrogat ana bolu qyzmetın tek Qazaqstan azamattaryna ǧana körsetu turaly normany belgıleu bölıgınde zaŋnamaǧa özgerıster engızu qajettılıgı pısıp-jetıldı. QR Densaulyq saqtau ministrlıgı QR «Neke (erlı-zaiyptylyq) jäne otbasy turaly» kodeksıne tüzetuler äzırlep, müddelı memlekettık organdarmen kelısu satysynda tūr. Müddelı memlekettık organdardyŋ kelısımın alǧannan keiın Parlamentke belgılengen tärtıppen engızıledı", - delıngen jauapta.
Qanat Bozymbaev salaǧa memlekettık baqylaudy küşeitu üşın Ädılet ministrlıgı surrogat ana bolu şarttaryn Bırtūtas notariattyq aqparattyq jüiede mındettı esepke ala bastaitynyn da aitqan.
