Syrtqy ıster ministrlıgınıŋ resmi ökılı Erlan Jetıbaev Qara teŋızdegı mūnai tankerlerıne qatysty oqiǧalar jönınde mälımdeme jasady, dep habarlaidy «Adyrna» tılşısı.
SIM jaǧdaidy baǧalau jäne halyqaralyq qūqyq normalaryn saqtau maqsatynda bırqatar europalyq memleketterdıŋ elşılerımen şūǧyl kezdesuler ötkızılgenın mälımdedı.
«Ministrlık 13 qaŋtarda Qara teŋız akvatoriiasynda Kaspii qūbyry konsorsiumynyŋ teŋız terminalyna bet alǧan üş tankerge ūşqyşsyz ūşu apparattary arqyly jasalǧan şabuyldarǧa bailanysty aitarlyqtai alaŋdauşylyq bıldıredı. Osy oraida bırqatar europalyq memleketterdıŋ elşılerımen ötkızılgen şūǧyl kezdesuler, sondai-aq amerikalyq tarappen jäne özge de şeteldık serıktestermen bolǧan bailanystar barysynda halyqaralyq qūqyq normalaryn qataŋ saqtai otyryp, kömırsutegın tasymaldaudyŋ, onyŋ ışınde teŋız joldaryndaǧy qauıpsızdıgın qamtamasyz etu boiynşa qajettı şaralar qabyldaudyŋ maŋyzdylyǧyna erekşe män berdık»,-delıngen habarlamada.
Syrtqy ıster ministrlıgı Qazaqstannyŋ eşqandai qaruly qaqtyǧysqa qatyspaitynyn, jahandyq jäne europalyq energetikalyq qauıpsızdıktı nyǧaituǧa eleulı üles qosyp kele jatqanyn jäne energiia resurstaryn jetkızudıŋ üzdıksızdıgın halyqaralyq talaptarǧa säikes qamtamasyz etıp otyrǧanyn atap öttı. Sonymen qatar, şabuylǧa ūşyraǧan tankerlerdıŋ barlyq qajettı rūqsaty bar ekenı jäne talap etılgen säikestendıru jabdyqtarymen qamtamasyz etılgenı aityldy.
«Soŋǧy uaqytta mūndai oqiǧalardyŋ jiıleuı halyqaralyq energetikalyq infraqūrylymnyŋ qalypty jūmys ısteuıne tönetın täuekelderdıŋ artyp kele jatqanyn aiǧaqtaitynyn atap ötemız jäne serıktesterımızdı aldaǧy uaqytta osyndai oqiǧalardyŋ aldyn alu maqsatynda bırlesken şaralar äzırleu üşın tyǧyz özara ıs-qimyl jasauǧa şaqyramyz»,-dep tolyqtyrdy SIM.
Eske salaiyq, 13 qaŋtarda Kaspii qūbyr konsorsiumy maŋynda Qazaqstannan keletın mūnaidy kütıp tūrǧan ekı tankerge dron şabuyldaǧan edı. Şabuyldy eşkım moinyna alǧan joq.
