Atyrau oblysynyŋ polisiiasy 29 jastaǧy Sūltan Särsemalievtı ızdestırıp jatyr, dep habarlaidy "Adyrna" ūlttyq portaly.
Küdıkke ılıngen azamat - qaza bolǧan erlı-zaiyptynyŋ küieubalasy.
Oblystyq PD baspasöz qyzmetı mälımdegendei, qazırgı uaqytta qyzmetkerler qylmysqa qatysy boluy mümkın basqa tūlǧalardy da tekserıp jatyr.
Sondai-aq, polisiia äleumettık jelılerde keiınen tanylǧan «haker» turaly aqparatqa pıkır bıldırdı. Būl azamat joǧalǧandardy özdıgınen ızdestırıp, derekterdı taldady. Ol SIM-kartalar, qarjylyq qozǧalystardy anyqtaǧanyn mälımdegen.
«Şyn mänınde barlyq mälımetter qūqyq qorǧau organdarynyŋ zaŋdy operativtık ızdestıru şaralary retınde tırkelgen. Atalǧan adam jaŋa derekter almaǧan jäne özdıgınen taldau jürgızbegen. Onyŋ taratqan aqparattary resmi orientirovkalarmen tolyq säikes keledı», – delıngen habarlamada.
Polisiia sonymen qatar qūqyq qorǧau organdary tarapynan qysym nemese qoqan-loqqy bar degen aqparatty joqqa şyǧardy.
«Haker» qazırgı taŋda tört alaiaqtyq faktısı boiynşa tergelıp jatqan tūlǧa jäne ol da ızdestırılude, – dep tolyqtyrdy departament.
Eske sala keteiık, būǧan deiın polisiia joǧalǧan jūp pen olardyŋ eresek ekı balasyn ızdestırgen. Aldymen 32 jastaǧy Nauryz Mūqanǧaliev jūmysyna ketkennen keiın habarsyz ketıp, bailanysqa şyqpaǧan. Sodan keiın qazan aiynda Jangeldı auylynan äke-şeşesı men äpkesı därıgerge baramyz dep şyǧyp, ketken. Otbasynyŋ qalǧan mülıkterı satylyp, qarajat äkesınıŋ şotyna tüsken.
Joǧalǧandar turaly aryz 25 jeltoqsanda tüsken edı.
