AQŞ Kongresı 2026 jylǧa arnalǧan qorǧanys biudjetı turaly zaŋ jobasyn maqūldady. Qūjatta äskeri şyǧyndar 901 mlrd dollar kölemınde belgılengen. Būl — rekordtyq körsetkış, dep habarlaidy «Adyrna» tılşısı DW-ge sılteme jasap.
Senattaǧy dauys beru kezınde ūlttyq qorǧanys turaly zaŋdy 77 senator qoldap, 20-sy qarsy dauys berdı. Ökılder palatasy būl qūjatty ötken aptada-aq maqūldaǧan. Endı zaŋ küşıne enuı üşın AQŞ prezidentı qol qoiuy tiıs. Aq üi Donald Tramptyŋ zaŋǧa qol qoiudy josparlap otyrǧanyn mälımdedı. Byltyr AQŞ-tyŋ äskeri biudjetı 884 mlrd dollardy qūraǧan.
Qūjatta äskeri qyzmetkerlerdıŋ jalaqysyn 3,8%-ǧa ösıru, äskeri tehnikany satyp alu şaralary qarastyrylǧan.
Sonymen qatar zaŋ jobasynda Europadaǧy qauıpsızdıktı nyǧaituǧa baǧyttalǧan bırqatar tarmaq bar. Būl Tramptyŋ ai basynda ūsynǧan AQŞ-tyŋ ūlttyq qauıpsızdık strategiiasymen qarama-qaişy. Jalpy alǧanda 901 mlrd dollar kölemındegı qorǧanys biudjetı prezident sūraǧan somadan asyp tüsedı. Aq üi basşysy 2026 jylǧa 892,6 mlrd dollar böludı ötıngen edı. Al Senat bastapqyda şyǧyndardy 925 mlrd dollarǧa deiın ūlǧaitudy ūsynsa, Ökılder palatasy Tramp ūsynǧan somaǧa jaqyn nūsqany qoldaǧan.
Qūjatta Ukrainany qoldauǧa da erekşe nazar audarylǧan. Zaŋ Ukraina qauıpsızdıgın qoldau bastamasy aiasynda 800 mln dollar böludı közdeidı. Būl qarjy Ukraina Qaruly küşterıne arnalǧan qaru-jaraqty amerikalyq kompaniialar arqyly satyp aluǧa jūmsalady.
Būdan bölek, Baltyq elderınıŋ — Estoniia, Latviia jäne Litvanyŋ qorǧanysyn nyǧaituǧa 175 mln dollar bölınbek. Sondai-aq zaŋ AQŞ qorǧanys ministrlıgınıŋ Europadaǧy amerikalyq äsker sanyn 76 myŋ adamnan tömendeuıne şekteu qoiady. Europadaǧy amerikalyq qolbasşyǧa NATO-nyŋ joǧarǧy bas qolbasşysy qyzmetınen bas tartuǧa tyiym salynady.
Zaŋ jobasynda Tramp ūsynǧan AQŞ qorǧanys ministrlıgın «Soǧys ministrlıgı» dep qaita atau turaly ūsynys atalmaidy. AQŞ äkımşılıgı būl ataudy beiresmi türde qoldanyp jürgenımen jäne qorǧanys ministrı Pit Hegset özın «soǧys mäselelerı jönındegı memlekettık hatşy» dep ataǧanymen, resmi türde mūndai özgerıs Kongress tarapynan bekıtıluı tiıs.
