Shahta apatynan qaıtys bolǵandardyń týystary Prezıdentten kómek surady, dep habarlaıdy “Adyrna” tilshisi.
Kostenko shahtasyndaǵy jarylysta jaqynynan aıyrylǵandar Memleket basshysy Qasym-Jomart Toqaevqa úndeý jasap, vıdeo jarııalady.
"Azamattarymyzdy qaıtara almaımyz, alaıda olardyń erlikpen qaza bolýy eskertkish retinde ornatylsa deımiz. Bolashaqta balalarymyz, nemerelerimiz basyna baryp, qurmetpen eske alsa. Bizdiń óńirde ártúrli shahtaǵa arnalǵan eskertkishter bar, biraq shahta jumysyn toqtatqan kezde olar da qaraýsyz qalyp jatyr. Sondyqtan eskertkish jaqyndarymyz qaza bolǵan jerde emes, kenshiler qalasy Qaraǵandynyń ortasynda ornatylsa deımiz”, - deıdi marqum bolǵan kenshilerdiń týystary.
Sondaı-aq, olar eskertkishtiń ornatylýy Prezıdenttiń qatań baqylaýynda bolyp, jumystyń tezdetilýin de suraıdy.
"Qurmetti prezıdent Qasym-Jomart Kemeluly Toqaev! Sizden kómek suraımyz. Bizder, qaıtys bolǵan qaharman kenshilerdiń otbasylary, birneshe márte jergilikti organdarǵa baryp, bul ótinishimizdi aıtqan edik. Alaıda olardan esh kómek bolmady. Prezıdentimiz muny beıjaı qaldyrmaıdy dep úmittenemiz", - deıdi ashynǵan jurt.
