Almatyda ötken XIII Qarjygerler kongressınde Ūlttyq bank töraǧasy Timur Süleimenov ekonomikadaǧy joǧary ösım kezınde halyq tabysynyŋ nege tömendep jatqanyn tüsındırdı, dep habarlaidy "Adyrna" ūlttyq portaly.
Sessiianyŋ moderatory, Ūlttyq banktyŋ eks-basşysy Oraz Jandosov Qazaqstandaǧy jaǧdaidyŋ qaişylyqty ekenın atap öttı. III toqsanda ekonomika 6,5% ösım körsetkenımen, naqty jalaqy bır jylda 2%-ǧa tömendegen. Sonymen qatar, qazan aiynda infliasiia 12,6%-ǧa jetıp, joǧary deŋgeide qalyp otyr.
Jandosovtyŋ «Ösımdı joǧaltpai, halyq tabysyn arttyryp, infliasiiany 7–8% deŋgeiıne qalai tüsıremız?» degen sūraǧyna jauap bergen Timur Süleimenov negızgı qiyndyq infliasiia ekenın aitty.
«Ekonomika 6,5% össe de, naqty tabys şamamen nölge jaqyn nemese azdap minusqa tüsken. Sebebı infliasiia öte joǧary. Būl — basty syn-qater», – dedı ol.
Süleimenovtıŋ aituynşa, COVID jäne post-COVID kezeŋınde keŋeigen biudjettık-salyqtyq saiasat keiıngı jyldary da ekspansiialyq sipatta qalyp qoiǧan. Ükımet Nasfondtan köbırek qarajat paidalanǧan, biudjet tapşylyǧy da joǧary bolǧan.
Onyŋ pıkırınşe, aldaǧy salyq jäne biudjettık reformalar infliasiiany aitarlyqtai tömendetetın bolady. Boljam boiynşa, biudjet tapşylyǧy 2,5–2,7%-dan 0,9%-ǧa deiın qysqarady.
Süleimenov sözın aiaqtaǧan soŋ, Oraz Jandosov Qyrǧyzstan ekonomikasynyŋ soŋǧy jyldary 10% tūraqty ösım körsetkenın, halyq tabysy da ösıp jatqanyn atap öttı.
«Bız Qyrǧyzstannan alda jürmız degen pıkır bar. Bıraq şyn mänınde, olai emes. Tarihi tūrǧyda da olar kei qadamdardy bızden būryn jasaǧan. Qazır de ekonomikasy belsendı ösıp keledı», — dedı ol.
Kongress barysynda Timur Süleimenov Qazaqstanda baǧaly qaǧazdar naryǧynda auqymdy reformalar jürgızıletının de mälımdedı.
