Şeşendık jurnalist Said Bisoev Qazaqstan halqyn köktemnıŋ alǧaşqy künındegı alǧys aitu künımen qūttyqtady, dep habarlaidy "Adyrna" ūlttyq portaly.
Said Bisoev qazaqstandyqtarǧa ızgı tılegın arnady:
"Sızderdı köktemnıŋ osy tamaşa merekesı – Alǧys aitu künımen qūttyqtaimyn. Bız 1944 jyly Qazaqstan panalaǧan repressiiaǧa ūşyraǧan inguş şeşenderdıŋ tıkelei ūrpaǧymyz. Bız bırneşe saiasi qasırettı kezeŋdı bırge ötkergen eldermız. Stalindık terrordyŋ auyr zardaptarynan älı aiyǧa qoimaǧan qazaqstandyqtar Kavkaz halqyna kömek qolyn sozdy. Qazaqstandaǧy «stalindık terror» qūrbandarynyŋ jalpy sany bırneşe millionnan asady. Bıraq dana qazaq şeşen, inguş jäne basqa jer audarylǧan halyqtardyŋ özderı siiaqty qūrban bolǧanyn tüsındı. Sondyqtan mümkındıgınşe kömektesıp, qoldau körsetuge tyrysty, būl ondaǧan myŋ adamdy ajaldan aman alyp qaldy" dep jazdy jurnalist özınıŋ äleumettık jelıdegı paraqşasynda.
Sondai-aq, ol qazaqstandyqtardyŋ janaşyrlyǧyn eşqaşan ūmytpaitynyn aitty:
"Ǧasyrlar ötse de, qazaqtyŋ erlıgı, batyldyǧy men tektılıgı ūrpaqtan-ūrpaqqa jalǧasyp, jüregımızde saqtalady. Bız qazırden bastap bırge boluǧa laiyqpyz! Bauyrlas halyq boluǧa daiynbyz! Raqmet, qazaq elı!" dedı ol.
Ūqsas jaŋalyqtar
