Bügın, 2025 jylǧy 5 qaraşada, Astanadaǧy «Qazmedia» ortalyǧynda Astana Media Week 2025 forumy öz jūmysyn bastady.
Toǧyz jyl ışınde forum Qazaqstandaǧy media salasyn damytuǧa arnalǧan basty alaŋǧa ainalyp, halyqaralyq jäne otandyq media käsıbi mamandaryn, mediabiznes ökılderı men memlekettık organdardy bırıktıretın maŋyzdy platforma bolyp qalyptasty.
Mediaaptanyŋ alǧaşqy künı «Jasandy intellekt pen sifrlandyru kezeŋındegı jurnalistikanyŋ jaŋa baǧyttary: qoǧam senımı jäne örkendeu» atty plenarlyq sessiiamen aşyldy. Forum qatysuşylaryna Qazaqstan Respublikasynyŋ Mädeniet jäne aqparat ministrı Aida Balaevanyŋ qūttyqtau haty oqyldy.
«Aqparat basty resursqa ainalǧan zamanda bızdıŋ osyndai basqosularymyzdyŋ maŋyzy erekşe. Sebebı däl osyndai alaŋda ǧana bız özektı mäselelerdı aşyq talqylap, qorytyndy jasap, sonyŋ negızınde biznes pen memlekettık basqaru jüiesıne qatysty maŋyzdy şeşımder qabyldai alamyz. Bügınde Qazaqstan keŋıstık pen uaqyt toǧysyndaǧy erekşe kezeŋdı bastan ötkerude. Memleket, qoǧam jäne media azamattardyŋ sūranysyna sai, eldıŋ aldaǧy damuynyŋ zamanaui baǧyt-baǧdaryn aiqyndap keledı. Memleket basşysynyŋ «Ädılettı Qazaqstandy» qūru ısınde osyndai özara bekem bailanys berık ırgetasqa ainaluǧa tiıs degenı de beker emes», – dedı Aida Balaeva.
Ministr Digital News Report zertteuıne säikes, Qazaqstan azamattarynyŋ būqaralyq aqparat qūraldaryna degen senım deŋgeiı Ortalyq Aziiadaǧy basqa eldermen salystyrǧanda aitarlyqtai joǧary ekenın aitty. Aida Balaevanyŋ aituynşa, būl – mediasalany reformalau boiynşa memleket jürgızıp kele jatqan jüielı saiasattyŋ nätijesı.
Ministr qūttyqtauynda atap ötkendei, Qazaqstan öŋırde alǧaşqylardyŋ bırı bolyp halyqaralyq standarttarǧa, sonyŋ ışınde Digital Services Act qaǧidattaryna negızdelgen «Onlain-platformalar jäne onlain-jarnama turaly» zaŋ qabyldady. Sonymen qatar jaŋa «Mass-media turaly» zaŋ redaksiialardyŋ qūqyqtyq märtebesın küşeitıp, jurnalisterdı qorǧau tetıkterın keŋeittı jäne aqparatqa qol jetkızu tärtıbın naqty aiqyndady. Aida Balaeva osy baǧyttaǧy jūmys jalǧasyn tabatynyn aita kele, ministrlık bırqatar zaŋnamalyq aktılerge özgerıster engızudı közdeitın tüzetuler äzırlep jatqanyn atap öttı. Būl tüzetuler aqparattyq keŋıstıktegı jyldam özgerısterge laiyqty jauap bolmaq.
Plenarlyq sessiiada sondai-aq QR Mädeniet jäne aqparat vise-ministrı Qanat Ysqaqov, Euronews-tıŋ Qazaqstandaǧy biuro jetekşısı Boian Brkich, Euronews halyqaralyq tılşısı (Fransiia) Denis Lokte, Özbekstan Ūlttyq media qauymdastyǧy bas direktorynyŋ orynbasary Sanjar Ustaboboev, Türkiia radioteleviziialyq korporasiiasynyŋ (Türkiia) Qazaqstandaǧy ökıldıgınıŋ direktory Mehmed Zahid Chalyşkan jäne "Jetınşı arna" telearnasynyŋ bas direktory İlham İbragimov söz söiledı.
Is-şara «Jurnalistika toǧysynda: jasandy intellektı bar sifrlyq medianyŋ paida boluy» atty paneldık sessiiamen jalǧasty. Būl alaŋda qazırgı aqparattyq keŋıstıktıŋ transformasiiasyndaǧy negızgı ürdıster talqylandy. Aita keterlıgı, baǧdarlamanyŋ bır bölıgı strimingtık platformalar naryǧyna arnaldy.
Aldaǧy ekı kün ışınde mediaortalyq hollynda Astana Media Week 2025 kontent-marketı ötedı. Būl – jaŋa formattar, koproduksiialar jäne halyqaralyq kooperasiialar tanystyrylatyn alaŋ. Kontent-market prodakşn-kompaniialar, distribiutorlar jäne platformalar arasyndaǧy ıskerlık kezdesuler ötkızuge mümkındık beredı. Mūnda Qyrǧyzstan, Özbekstan, Qytai men Qazaqstannyŋ ışkı jäne syrtqy naryqtaryna arnalǧan jaŋa ideialar, pilottyq jobalar men bırlesken öndırıs mümkındıkterı ūsynylady.
Astana Media Week 2025 7 qaraşaǧa deiın jalǧasyp, elımızdıŋ barlyq öŋırlerınen memlekettık, täuelsız jäne jaŋa media ökılderı bas qosady. Qatysuşylar üşın plenarlyq jäne paneldık talqylaular, jabyq pitching-sessiialar, sondai-aq saladaǧy jetekşı sarapşylar ötkızetın praktikalyq master-klasstar ūiymdastyrylady.
Mediaapta aiasynda eŋ belsendı qatysuşylarǧa arnaiy syilyqtar qarastyrylǧan. Üzdık sūraq qoiǧan avtorlar jetekşı strimingtık servis, mediamonitoringtık kompaniialardyŋ jyldyq jazylymyna arnalǧan sertifikattar jäne bas jülde – Samarqandqa saiahat ūtyp alu mümkındıgıne ie bolady.
