Qazaqstan ışkı ıster ministrlıgı Astanada mas küiınde kölık jürgızgen sudianyŋ ūstaluyna qatysty tüsınıkteme berdı, dep habarlaidy "Adyrna" ūlttyq portaly Tengrinews.kz-ke sıltep.
2 qaraşada äleumettık jelılerde Astana qalasyndaǧy Azamattyq ıster jönındegı audanaralyq sottyŋ sudiasy Äsel Dosaevanyŋ mas küiınde kölık tızgındegenı turaly aqparat taraǧan.
IIM mälımetınşe, oqiǧa 1 qaraşa künı taŋǧy saǧat 04:30 şamasynda «Han Şatyr» sauda ortalyǧy maŋynda bolǧan. Patruldık polisiia qyzmetkerlerı Mazda-6 avtokölıgın toqtatyp, jürgızuşıden alkogoldık masaŋdyq belgılerın anyqtaǧan.
«Tekseru barysynda jürgızuşınıŋ mas küiınde bolǧany jäne kölıktı jaramdylyq merzımı ötıp ketken jürgızuşı kuälıgımen basqarǧany anyqtaldy», — delıngen IIM resmi habarlamasynda.
Atalǧan derek boiynşa materialdar Bas prokuraturaǧa joldandy. Būl organ öz kezegınde Joǧary sot keŋesıne sudiany jauapqa tartu mäselesın qarauǧa ūsynys engızedı.
Būǧan deiın polisiia kölıktıŋ kommunaldyq tūraqqa qoiylǧanyn jäne oqiǧaǧa bailanysty tekseru jürgızılıp jatqanyn habarlaǧan.
