Türkı älemınıŋ ruhani astanasy – Türkıstan qalasynda 25 qazan – Respublika künıne arnalǧan «Qyran elım – Qazaqstanym!» saltanatty ıs-şarasy öttı. Merekelık ıs-şaraǧa qatysuşylar aldymen Alaş qairatkerlerınıŋ otty oilaryn tyŋdap, öŋır önerpazdarymen bırge Qazaqstan Respublikasynyŋ Memlekettık Änūranyn şyrqady.
Maŋyzdy ıs-şaraǧa qatysqan Türkıstan oblysynyŋ äkımı Nūralhan Köşerov jūrtşylyqty aituly merekemen qūttyqtap, öŋırdıŋ damuyna eleulı üles qosyp kele jatqan bır top azamatty marapattady.
– Sızderdı Respublika künımen şyn jürekten qūttyqtaimyn! Būl – halqymyzdyŋ san ǧasyrlyq armany oryndalǧan kün. 1990 jyldyŋ 25 qazanynda qabyldanǧan Deklarasiia – elımızdıŋ erkındıkke jasaǧan alǧaşqy naqty qadamy. Bügınde bız älemge täuelsız, beibıt, bırtūtas jäne damuşy memleket retınde tanyldyq. Eldıgımız anyqtalyp, şekaramyz belgılendı. Jarqyn bolaşaqqa senımmen qadam basyp kelemız. Būl – bırlık pen parasattyŋ jeŋısı. El Prezidentı Qasym-Jomart Kemelūly biylǧy Joldauynda el damuynyŋ jaŋa basymdyqtaryn aiqyndady. Sifrlyq damu, investisiia tartu, ekonomikany ärtaraptandyra otyryp, şikızattyq sektordan tereŋ öŋdeudı damytudy tapsyrdy. Memlekettık basqaru, bılım beru men densaulyq saqtau jüiesın jasandy intellekt arqyly jaŋǧyrtudy jüktedı. Sonymen bırge sifrlyq tehnologiialardy agroönerkäsıp pen öŋırlık ekonomikaǧa engızu mındetın de jüktep otyr. Osyǧan säikes Türkıstan oblysynda da naqty şaralar qolǧa alyndy. Bızdıŋ basty maqsatymyz – halyqtyŋ ömır süru sapasy men äl-auqatyn arttyru. Bügınde Türkıstan tek kielı şahar ǧana emes, strategiialyq maŋyzdy öŋırge ainaldy. Bızdıŋ aldymyzda tūrǧan mındet – osy tarihi mümkındıktı tolyq paidalanyp, Türkıstandy tek oblys ortalyǧy ǧana emes, el ekonomikasyna serpın beretın aimaqqa ainaldyru. Būl üşın bız bırlıgımızdı bekemdep, eldık müdde jolynda jūmyla eŋbek etuımız qajet. Elımız aman, jūrtymyz tynyş, Türkıstanymyz nūrly bolsyn! – dedı Nūralhan Oralbaiūly.
Saltanatty ıs-şarada oblys äkımı Nūralhan Köşerov eŋbegımen daralanǧan eŋbek adamdary men memlekettı damytuǧa üles qosyp jürgen qairatker azamattardy marapattady. Atap aitqanda, «Parasat», «Qūrmet» ordenderı men «Eren eŋbegı üşın», «Şapaǧat» medaldaryn tapsyrdy. Marapattalǧandardyŋ qatarynda eŋbek ardagerlerı, mūǧalımder men därıgerler, mädeniet jäne biznes ökılderı, baqtaşylar men maşinister bar. Sonymen qatar saltanatty şarada oblys äkımı Nūralhan Köşerov Memlekettık qyzmet ısterı agenttıgınıŋ Töraǧasy Darhan Jazyqbaidyŋ «Memlekettık qyzmet ardagerı» tösbelgısımen Maqtaaral audanynyŋ äkımı Asanov Baqyt Nasyrhanūlyn marapattady.
Memleket basşysy halyqqa biylǧy Joldauynda investisiia tartu jüiesın jaŋǧyrtudy tapsyrǧan bolatyn. Oblysta qolaily investisiialyq klimat qalyptasqan. Oblys ekonomikasynyŋ damuyna tyŋ serpın beretın jalpy qūny 2,6 trln. teŋgenı qūraityn 111 investisiialyq joba puly qalyptasty. Negızgı baǧyttary – öŋdeu, energetika jäne auyl şaruaşylyǧyn tereŋ qaita öŋdeu. Jobalardy tolyq ıske asyru nätijesınde 24 myŋǧa juyq jaŋa jūmys orny aşylyp, biudjetke qosymşa 100 mlrd. teŋge salyq tüsedı. Biyl 332 mlrd. teŋgege 57 jobany ıske asyryp, 8 174 jūmys ornyn aşu josparlanǧan. 9 aida 33 joba ıske qosylyp, 4793 jūmys orny aşyldy. Atqarylǧan jūmystardyŋ nätijesınde 9 aida öŋır ekonomikasyna 1 trln. teŋge investisiia baǧyttalyp, 115,9%-ǧa östı.
Memleket basşysy el damuynyŋ negızgı sektory – quatty önerkäsıp äleuetıne negızdelgen jäne ärtaraptandyrylǧan ekonomikany qūru qajettılıgın aiqyndap öttı. Öŋırdıŋ industrializasiia äleuetın damytu maqsatynda 20 industrialdy jäne 3 arnaiy ekonomikalyq aimaqtar, şaǧyn önerkäsıptık park qūrylǧan. İndustrialdyq aimaqtarda qūny 152 mlrd. teŋgenı qūraityn 98 investisiialyq joba ıske asyryluda.
Jalpy önerkäsıp salasynda atqarylǧan şaralardyŋ esebınen 9 aida 1,1 trln. teŋgege önerkäsıp önımı öndırılıp, ösım 113,5%-ǧa jettı. Öŋır ekonomikasynyŋ maŋyzdy salasy auyl şaruaşylyǧynda önım 855 mlrd. teŋgenı qūrap, ösım 101,5% deŋgeiınde oryn aldy.
