Mäjılıs deputaty Nartai Särsenǧaliev qoǧamdaǧy “qauıptı prankterge” qatysty qataŋ şara qabyldaudy ūsyndy, dep habarlaidy “Adyrna” ūlttyq portaly.
Deputat qoǧamda keŋ etek jaiǧan prank beinerolikterge bailanysty Ükımetke saual joldady.
Deputattyŋ aituynşa, soŋǧy uaqytta äleumettık jelılerde adamdy qorqytu, qoǧamdyq orynda ädepsız äreketter jasau, özge adamnyŋ jeke ömırıne qol sūǧu siiaqty «äzıl» türınde tüsırılgen beineler köbeiıp ketken.
«Prankpen paraqşasyndaǧy lüpıldıŋ sanyn arttyrǧanmen, parasat biıgınen omaqasa qūlaǧandar qaptap kettı. Qoǧamda pranktı qyzyq körıp, aqylǧa syimaityn äreket jasap jürgender az emes», – dedı Nartai Särsenǧaliev.
Ol naqty mysaldar keltırıp, Astanada lift ışıne «jalǧan mäiıt» kırgızıp, adamdardy şoşytqan, tapanşamen qoǧamdyq orynda video tüsırgen, Almatyda aula sypyruşylardy mazaq etken blogerlerdıŋ äreketterın synǧa aldy.
Sondai-aq deputat şetelde Qazaqstannyŋ abyroiyna nūqsan keltırgen prankterge de toqtaldy. Onyŋ sözınşe, Qytai men Özbekstanda tüsırılgen kei videolar el imidjıne kerı äserın tigızıp otyr.
«Oiynnan da omyrtqa synatynyn bılmeitın bloger-symaqtardy qataŋ jauapqa tartatyn kez keldı. Būl – adamnyŋ jeke ömırıne qol sūǧu, qoǧamdyq tärtıptı būzu», – dedı ol.
Särsenǧaliev soŋǧy uaqytta jasandy intellekt arqyly jasalǧan prankterdıŋ de köbeigenıne alaŋdauşylyq bıldırdı. Mūndai beinelerde memlekettık tūlǧalar nemese qarapaiym azamattardyŋ jalǧan beinesı jasalyp, qoǧamda şatasu tuyndauda.
Osyǧan orai ol Ükımet pen tiıstı organdarǧa arnaiy şaralardy qabyldaudy ūsyndy.
