Jambyl oblysynda bır top er adam qyzdy küşpen kölıkke otyrǧyzyp, belgısız baǧytqa alyp ketken, dep habarlaidy «Adyrna» tılşısı.
Oqiǧanyŋ beinejazbasy äleumettık jelıde tarady. Aldyn ala mälımet boiynşa, oqiǧa tūrmys qūru maqsatyndaǧy «alyp qaşu» operasiiasymen bailanysty boluy mümkın.
Jambyl oblystyq polisiia departamentı būl oqiǧaǧa qatysty tüsınıkteme berdı.
«Atalǧan faktı boiynşa tekseru jürgızılıp, nätijesınde oqiǧaǧa qatysy bar barlyq tūlǧa anyqtalyp, tergeuge alyndy. QR Qylmystyq kodeksınıŋ 125-baby — «Adam ūrlau» boiynşa sotqa deiıngı tergeu bastaldy. Taraptardyŋ būrynnan tanys bolǧany jäne özara şaǧymdary joq ekenı anyqtaldy»,—delıngen habarlamada.
Eske sala keteiık, biyl Qylmystyq kodekstıŋ 125-baby boiynşa jaza küşeitılgen edı. Endı adam ūrlaǧandar jetı jylǧa deiın bas bostandyǧynan aiyryluy mümkın.
