Qazaqstanda eŋ tömengı jalaqy deŋgeiı kelesı jyly da özgerıssız qalady. Būl turaly Mäjılıs deputaty Däulet Mūqaev öz pıkırın bıldırdı, dep habarlaidy «Adyrna» tılşısı.
«Ökınışke qarai, bız ol 85 000-dy qanşa jerden köterudı ūsynǧanymyzben, kelesı jyly minimaldy ailyq sol deŋgeide qalyp otyr. “Būny eşkım almaidy” dep Ūlttyq bank töraǧasy da aitty. Ol “būl jai ǧana san” dedı. Men oǧan kelıse almaimyn, sebebı men Eŋbek jäne halyqty äleumettık qorǧau ministrı Svetlana Qabykenqyzyna joldaǧan saualymda naqty sandardy sūraǧan kezde, bızdıŋ elımızde şamamen 1 100 000-nan astam adam sol 85 000 teŋgenıŋ ailyǧyn alyp otyr. İä, oqu kerek, toqu kerek, äreket etu kerek dep aitamyz ǧoi. Bıraq olardy oqytu üşın de ükımet müddelı bolu kerek qoi. Jaŋadan kurstar aşu, mümkın, jūmysşy mamandyqtarǧa üiretu, mümkın, kolledjge oquǧa yntalandyru siiaqty talpynys jūmystaryn jürgızu qajet. Ökınışke qarai, men ondai närsenı körıp otyrǧan joqpyn», – dedı deputat. Sondai-aq Däulet Mūqaev infliasiia deŋgeiınıŋ joǧary boluy halyqtyŋ tabysyna tıkelei äser etıp otyrǧanyn aitty.
«İä, kelısemın — 85 000 teŋge eşteŋege jetpeidı. Sebebı infliasiianyŋ özı 12,9 paiyz bolyp otyr. Jaŋaǧy aitqandai, 5–6%-dyq jospar tūr Ūlttyq bankte, bıraq onyŋ auyly alys. Mümkın, ükımet keide şeşe almai jürgen mäselelerdı Prezident mındettı türde ündeu joldap, sol mäselenı köteretını anyq», – dedı ol.
Deputattyŋ aituynşa, eŋ tömengı jalaqy mölşerı halyqaralyq standarttarǧa säikes kelmeidı. «Jalpy, medianalyq ailyq degen bar — būl düniejüzılık formula. Sol eseptıŋ deŋgeiınde medianalyq ailyqtyŋ elu paiyzy eŋ tömengı jalaqyboluy kerek. Ol şamamen 150–160 myŋ teŋge deŋgeiınde bolu kerek edı. Ökınışke qarai, bız ol mölşerden ekı ese tömenbız», – dedı Mäjılıs deputaty
