AQŞ-ta prezident Donald Tramptyŋ saiasatyna qarsy baǧyttalǧan keŋ auqymdy narazylyq aksiialary öttı. "No Kings" ("Patşalarǧa jol joq") dep atalatyn qozǧalys aiasynda ötken būl beibıt şerulerge şamamen 7 million adam qatysqan, dep habarlaidy “Adyrna”.
Ūiymdastyruşylardyŋ aituynşa, narazylyqtar AQŞ tarihyndaǧy eŋ ırı bırkündık şerulerdıŋ bırı bolǧan. Aksiialar eldıŋ 2 700-den astam qalasynda öttı jäne eşqandai tärtıp būzuşylyqsyz, beibıt türde ūiymdastyrylǧan.
Mäselen, Chikago qalasynda ötken şeru Indivisible Chicago Alliance ūiymynyŋ bastamasymen ūiymdastyrylyp, oǧan 250 myŋǧa juyq adam qatysqan. Qatysuşylar avtoritarlyq basqaru stilıne qarsylyq bıldırıp, AQŞ — "patşalarǧa" emes, halyqqa tiesılı el ekenın alǧa tartty.
No Kings qozǧalysy senbı künı AQŞ-tyŋ barlyq ştattarynda jäne Vaşingtonda öz ünın jetkızdı. Al alǧaşqy şeruler 14 mausymda — äskeri parad pen Donald Tramptyŋ 79 jyldyq tuǧan künıne orai ötken bolatyn.
Eske salsaq, şeruler qarsaŋynda Tramp Fox News telearnasyna bergen sūhbatynda aldaǧy narazylyqtarǧa qatysty pıkır bıldırıp, özın "patşa retınde sanamaitynyn" aitqan edı.
