Mäskeudıŋ Tretiakov galereiasynda Äbılhan Qasteev atyndaǧy QR Memlekettık öner muzeiı äzırlegen «Qazaqstan önerınıŋ jauharlary» atty körme aşyldy.
Is-şara Resei Federasiiasynda Qazaqstan Respublikasynyŋ mädeni künderı aiasynda ötıp jatyr. Saltanatty räsımge QR Mädeniet jäne aqparat ministrı Aida Balaeva bastaǧan qazaqstandyq delegasiia qatysty.
«Reseidegı Qazaqstannyŋ mädeni künderı – ekı el arasyndaǧy yntymaqtastyqtyŋ maŋyzdy kezeŋı, üzdıksız diplomatiialyq dialogtyŋ jemısı. Būl auqymdy joba Mäskeudıŋ jetekşı mädeniet alaŋdaryn qamtyp, Qazaqstannyŋ zamanaui mädeni jetıstıkterınıŋ keŋ palitrasyn – teatr men muzykadan bastap, kino jäne beineleu önerıne deiın ūsynady. Keiıngı 34 jylda Mäskeude qazaq suretşılerınıŋ körmesı alǧaş ret ötıp otyr. Ä. Qasteev atyndaǧy Memlekettık öner muzeiınıŋ kartinalary «Krymskii val» galereiasynda eŋ soŋǧy ret 1991 jyldyŋ tamyzynda qoiylǧan edı. Sondyqtan bügıngı ekspozisiiany bız Qazaqstan men Resei arasyndaǧy mädeni bailanystardy nyǧaitudaǧy jarqyn oqiǧa ärı jaŋa beles dep baǧalaimyz», – dedı Aida Balaeva.
Ä. Qasteev atyndaǧy Memlekettık öner muzeiınıŋ «Qazaqstan önerınıŋ jauharlary» körmesı XX ǧasyrdaǧy talantty şeberlerdıŋ 60-tan astam keskındeme jäne müsın tuyndylaryn qamtidy.
Ūlttyq beineleu önerı mektebınıŋ qalyptasuy Äbılhan Qasteevtıŋ esımımen tyǧyz bailanysty. Onyŋ tuyndylary ötken ǧasyrdyŋ basynda köşpendıler ömırındegı qarqyndy özgerısterın beineleitın körkem şejırege ainaldy.
Körme 23 qaraşaǧa deiın jalǧasady. Körmege keluşıler belgılı qazaqstandyq müsınşıler Tölegen Dosmaǧambetov, Erkın Mergenov, Olga Prokopeva jäne Esken Sergebaevtyŋ eŋbekterımen tanysa alady. Būl tuyndylar qazaq müsın önerınıŋ tūtas bır buynynyŋ şyǧarmaşylyq ızdenısterı men körkemdık ūstanymdaryn aiqyn körsetedı.
10-13 qazan aralyǧynda qazaqstandyq jäne şeteldık körermenınıŋ köŋılınen şyqqan «Vremia patriotov», «Toqta, tün!», «Dos-Mūqasan», «1941 jyldyŋ jazy», «90+1» filmderı men «Altyn adam» multfilmın köre alady.
Barlyq film qazaq jäne orys tılderınde körsetıledı.
Reseilık körermen üşın 13 qazan künı Kışı teatr sahnasynda «Parasat maidany» spektaklı qoiylady. Qoiylym – zamanaui adamnyŋ ruhani ızdenısterı men ışkı älemın suretteitın psihologiialyq drama. Qazaq ädebietınıŋ klassigı Tölen Äbdık şyǧarmalary negızınde sahnalanǧan. Spektakldı Q.Quanyşbaev atyndaǧy Qazaq memlekettık akademiialyq muzykalyq-drama teatrynyŋ akterlerı sahnalaidy.
Reseidegı Qazaqstannyŋ mädeni künderı qaraşa aiynda qazaqstandyq önerpazdardyŋ gala-konsertımen qorytyndylanady.
