Qūrlyq äskerlerınıŋ bas qolbasşysy basqarmasy Maŋǧystau oblysyndaǧy sarbazdyŋ anasy kötergen şaǧymǧa tüsınıkteme berdı, dep habarlaidy “Adyrna” ūlttyq portaly.
Äiel balasynyŋ äskerde älımjettık körgenın aityp, keiın onyŋ psihiatriialyq klinikaǧa jatqyzylǧanyn habarlap, dabyl qaqqan.
Köktemde äskerge şaqyrylǧan 18 jastaǧy azamatqa qyrküiek aiynyŋ soŋynda “büirek pen jürek aurularyna bailanysty mamandarǧa qaralu qajet” dep aitylǧan. Keiınnen onyŋ ornyna psihiatriialyq klinikaǧa jatqyzylǧany belgılı boldy. Klinika qyzmetkerlerı sarbazdyŋ “suisidtık oilaryna bailanysty” tüskenın mälımdegen.
Keiın anasy balasynyŋ fizikalyq zorlyq qana emes, jynystyq zorlyq-zombylyqqa da ūşyraǧanyn aitqan.
Qorǧanys ministrlıgınıŋ Qūrlyq äskerlerı basqarmasy habarlaǧandai, sarbazdyŋ anasy tüsırgen beineündeu negızınde ışkı ıster ministrlıgınıŋ Batys öŋırı boiynşa äskeri-tergeu basqarmasy qylmystyq ıs qozǧaǧan. Sonymen qatar arnaiy ofiserlerden qūralǧan jūmys toby qūrylyp, qyzmettık tekserıs bastaldy.
Tekseru barysynda fizikalyq nemese jynystyq zorlyq faktılerı rastalmaǧan.
«Kuägerlerdıŋ aiǧaqtary boiynşa sarbazǧa qatysty zorlyq-zombylyq äreketterı anyqtalmady. Videobaqylau kameralarynyŋ jazbalary zerttelıp, äskeri tärtıp būzuşylyq derekterı tırkelgen joq», – delıngen resmi jauapta.
Basqarma ökılderı sarbazdyŋ öz aiǧaqtary bırneşe ret özgergenın jäne aitqan nūsqalary bır-bırıne qaişy kelgenın atap öttı.
Qazır sarbaz Aqtaudaǧy äskeri-tergeu basqarmasynda. Tergeu şaralary aiaqtalǧan soŋ ony Astanaǧa, Qorǧanys ministrlıgınıŋ bas gospitalıne jıberu josparlanyp otyr. Onda onyŋ äskeri qyzmettı jalǧastyruǧa jaramdylyǧy anyqtalady.
Psihonevrologiialyq dispanser mamandarynyŋ qorytyndysyna säikes, sarbazda psihologiialyq tūraqsyzdyq bar.
«Psihologiialyq zertteu nätijesınde onyŋ beiımdelu deŋgeiı tömen, moraldyq tūraqtylyǧy älsız ekenı anyqtaldy. Äskerde jürgen kezınde de tūiyqtyq, enjarlyq, depressiialyq belgıler baiqalǧan. Būǧan deiın öz-özıne ziian keltıruge talpynys jasaǧan», – delıngen basqarma mälımetınde.
Qorǧanys ministrlıgı balany “äskerge jaramdy” degen şeşımge tüsınıkteme berdı.
«Medisinalyq komissiia qūramyna azamattyq medisina salasynyŋ mamandary enedı. Olar Qorǧanys ministrlıgıne emes, jergılıktı atqaruşy organdarǧa baǧynady. Komissiia qūramyn oblys pen qalalar äkımderınıŋ orynbasarlary taǧaiyndaidy», – dep habarlady.
