Digital Bridge 2025 forumy aiasynda IT älemdegı eŋ ırı startap-dodalarynyŋ bırı – Astana Hub Battle öttı. Ortalyq Euraziia elderınen jinalǧan 180 IT-kompaniia öz önımın damytu üşın jalpy somasy $125 000 qūraityn jülde qoryn sarapqa saldy.
Jartylai finalǧa bäsekege qabılettı 79 joba öttı, olardyŋ ışınen 14 üzdık startap finaldyq şaiqasqa ırıkteldı: eXpace Technology, Hemo.Labs, YAYA, MoonAI, flection.ai, CYBERPACK.AI, OpenSpot, Mirai Tech, Oina AI, AIGINEER, NeuroGuard AI, MacDent, MindShield jäne WeGlobal AI. Sonymen bırge finalǧa AI Sana Generative Pitch baiqauynda jeŋıske jetken TrustExam AI da qosyldy.
«Astana Hub Battle özınıŋ öŋırdegı IT-käsıpkerler üşın basty alaŋ ekenın taǧy bır märte däleldedı. Bügınde Ortalyq Euraziianyŋ startaptary jasandy intellekt, medisina, bılım beru, qarjy tehnologiialary jäne basqa da salalarda bäsekege qabılettı şeşımder ūsynyp otyr. Mūndai bastamalar bılım ekonomikasyn qalyptastyryp, jaŋa jūmys oryndaryn aşyp, salanyŋ damuyna tyŋ serpın beredı. Bız üşın käsıpkerlerdı qoldau ǧana emes, jastardyŋ tehnologiiaǧa degen qyzyǧuşylyǧyn arttyru da asa maŋyzdy. Sebebı bolaşaqqa bastaityn eŋ ülken mümkındıkter osy IT men AI salasynda jatyr. Būl şaranyŋ jüzege asuyna üles qosqan serıktesterımız ben demeuşılerımızge şynaiy rizaşylyǧymdy bıldıremın. Ortaq küş-jıgerımızdıŋ arqasynda būl ıs-şara sättı öttı», – dedı Astana Hub bas direktory Maǧjan Mädiev.
Astana Hub Battle 2025 jeŋımpazdary jetı nominasiia boiynşa anyqtaldy. Alǧaşqy bes negızgı sanattyŋ ärqaisysy $25 000 aldy.
Best Social Impact nominasiiasynda jasandy intellekttı mektep oquşylarynyŋ käsıbi baǧdaryn anyqtauǧa jäne psihologiialyq qoldau körsetuge paidalanatyn WeGlobal.AI jeŋıske jettı. Jüldenı inDrive negızın qalauşysy ärı bas direktory Arsen Tomskii tabys ettı.
Discovery of the Year nominasiiasynda Parkinson auruyn erte kezeŋde anyqtauǧa arnalǧan mobildı qosymşa men bılezık jasap şyǧarǧan MindShield üzdık dep tanyldy. Marapatty QR Premer-ministrınıŋ orynbasary, Jasandy intellekt jäne sifrlyq damu ministrı Jaslan Mädiev tabystady.
Exponential Growth nominasiiasynyŋ jeŋımpazy – memlekettık organdarǧa, universitetterge jäne emtihan ortalyqtaryna akademiialyq adaldyqty arttyruǧa jäne köşıru faktılerımen küresuge kömektesetın TrustExam AI startaby. Jüldenı Telegram negızın qalauşysy ärı bas direktory Pavel Durov tabystady.
Ticket to the Future (Astana Hub Ventures-ten SAFE) nominasiiasynda şaǧyn jäne orta biznes üşın jasandy intellekt negızınde jūmys ısteitın operasiialyq jüie ūsynatyn Moon.AI startaby jeŋımpaz atandy. Jüldenı Astana Hub bas direktory Maǧjan Mädiev tabystady.
MA7 Award (MA7 Ventures atynan) nominasiiasynda qazaqstandyq DeepTech-startap Mirai Tech top jardy. Kompaniia jasandy intellekt pen avtonomdy quattandyruǧa negızdelgen sport pen reabilitasiiaǧa arnalǧan tozylmaityn sensorlar äzırleude. Jüldenı MA7 Ventures negızın qalauşysy Mūrat Abdrahmanov tabystady.
«Qazaqtelekom» AQ arnaiy grant retınde qūny $25 000-ǧa teŋ GPU-resurstardy ūsyndy. Ony stomatologiialyq klinikalar men medisina ortalyqtaryna arnalǧan būltty ERP/CRM platforma ūsynatyn MacDent jeŋıp aldy. Jüldenı «Qazaqtelekom» AQ basqarma töraǧasy Baǧdat Musin tabys ettı.
Sonymen qatar Yandex Qazaqstan Startup Spotlight Award arnaiy marapaty flection.ai startabyna berıldı. Būl joba – insulttan keiıngı oŋaltudy jasandy intellektke negızdelgen oiyndar arqyly jeŋıldetetın veb-platforma. Jüldenı Yandex Cloud kompaniiasynyŋ Qazaqstan jäne Ortalyq Aziiadaǧy marketing boiynşa direktory Janar Mahambetova tabystady.
«Bız eşqandai investisiia tartqan joqpyz, biznestı öz küşımızben damyttyq. Bügınde bız özımızdı öte senımdı sezınemız jäne jaŋa naryqtardy baǧyndyruǧa daiynbyz. Aldaǧy josparymyz – AQŞ, Kanada jäne Ūlybritaniiaǧa şyǧu. Qazırdıŋ özınde Ūlybritaniiadaǧy ırı ūiymmen kelısımşartqa qol qoidyq, bolaşaqta onda jylyna 4 million adamǧa deiın qyzmet körsetudı maqsat etıp otyrmyz. Bızdıŋ startapqa 5 jyl toldy, al Astana Hub Battle-degı būl jeŋıs – dūrys jolda ekenımızdıŋ aiǧaǧy», – dedı Astana Hub Battle 2025 jeŋımpazy, TrustExam AI startabynyŋ negızın qalauşysy Nūraly Sarbaqyş.
Astana Hub Battle-ǧa MVP nemese PMF satysynda masştabtalatyn jobalar qatysty. Biylǧy jyly baiqauǧa Qazaqstan, Täjıkstan, Resei, Qyrǧyzstan, Özbekstan, Äzerbaijan, Moŋǧoliia, AQŞ jäne BAÄ elderınen ötınımder tüstı.
Eske salaiyq, Digital Bridge 2025 halyqaralyq forumy 2–4 qazan aralyǧynda Astanada ötude. Būl – Ortalyq Euraziiadaǧy tehnologiia jäne jasandy intellekt salasyndaǧy eŋ auqymdy ıs-şara, ol älemdık industriia köşbasşylarynyŋ, investorlardyŋ, sarapşylardyŋ jäne startaptardyŋ basyn qosty.
Biylǧy forum serıktester men demeuşılerdıŋ qoldauynyŋ arqasynda ūiymdastyryldy. Barlyq şyǧyn demeuşılık qarajat esebınen jabyldy.
