Batys Qazaqstan oblysy, Oral qalasynda, «Joǧary injenerlık-tehnologiialyq kolledjı» bazasynda «VETAGROSKILLSHUB» Qūzyrettılık ortalyǧynyŋ resmi aşyluy öttı. Jaŋa ortalyq käsıbi bılım beru men eŋbek naryǧy arasyndaǧy bailanysty küşeitıp, aimaqtyŋ ekonomikalyq äleuetın damytuǧa baǧyttalǧan maŋyzdy bastama bolmaq.
Ortalyqtyŋ basty maqsaty – halyqaralyq WorldSkills International standarttaryna säikes bılıktı mamandar daiarlau arqyly aimaqtaǧy öndırıs pen auyl şaruaşylyǧy salasyna serpın beru.
«VETAGROSKILLSHUB» Qūzyrettılık ortalyǧy aimaq eŋbek naryǧyna qajettı sūranysqa ie mamandardy daiarlauǧa baǧyttalǧan. Mūnda studentter men öndırıstık şeberler WorldSkills halyqaralyq chempionattaryna daiyndalu üşın arnaiy oqu-jattyǧu bazasyn paidalana alady. Sonymen qatar, kolledj oqytuşylary men öndırıstık oqytu şeberlerınıŋ bılıktılıgın arttyruǧa arnalǧan treningter men kurstar ūiymdastyrylady. Ortalyq jūmyssyz azamattar men mamandyǧyn auystyruǧa niettı adamdarǧa qaita daiarlau mümkındıgın ūsynady. Jastar men mektep oquşylaryna käsıbi baǧdar beru jūmystary jürgızılıp, jūmysşy mamandyqtarynyŋ bedelı köterılude. Oqytu prosesınde halyqaralyq standarttarǧa säikes ozyq tehnologiialar men zamanaui ädıstemeler belsendı türde engızıledı.
«VETAGROSKILLSHUB» Qūzyrettılık ortalyǧy «Batys Qazaqstan innovasiialyq-tehnologiialyq universitetınıŋ» agrarlyq innovasiialyq-tehnologiialyq parkımen tyǧyz ärıptestık ornatqan. Būl serıktestık bılım beru mazmūnyn öndırıske jaqyndatyp, praktikalyq daǧdylardy damytuǧa jol aşady.
«VETAGROSKILLSHUB» – būl aimaqtyq jäne halyqaralyq käsıbi chempionattarǧa daiyndyq alaŋy, jaŋa tehnologiialardy synaqtan ötkızetın oqu platformasy, sondai-aq jastardyŋ ǧylymi jäne innovasiialyq äleuetın arttyruǧa baǧyttalǧan ortalyq. Būl bastama aimaqtyŋ äleumettık-ekonomikalyq damuyna oŋ äser etıp, käsıbi bılım beru salasynda jaŋa kezeŋnıŋ bastaluyn bıldıredı.
BQO bılım basqarmasy baspasöz qyzmetı
