Qazaqstan Resei men Ukraina arasyndaǧy kelıssözder alaŋyna ainaluǧa daiyn. Būl turaly RTVI arnasyna bergen sūhbatynda Mäjılıs deputaty, Halyqaralyq ıster, qorǧanys jäne qauıpsızdık komitetı töraǧasynyŋ orynbasary Aidos Sarym mälımdedı, dep habarlaidy "Adyrna" ūlttyq portaly.
«Barlyq deldaldyq pen moderasiiaǧa qatysty aitar bolsam, eger mümkındık pen qajettılık tuyndasa, Qazaqstan deldal retınde şyǧyp, qandai da bır mäselenı retteuge kömektesuge daiyn. Būl Resei men Ukraina qaqtyǧysyna da qatysty boluy mümkın. Men jalpy prosestı aityp tūrǧan joqpyn, bıraq jekelegen keisterdı şeşu tūrǧysynda nege bolmasqa. Öitkenı kelıssözder ädette ärtürlı deŋgeidegı mäseleler qaralatyn ärtürlı alaŋdarda ötedı. Ärine, mūnyŋ bärı tek taraptar kelısuge niet bıldırgende ǧana mümkın bolady», - dedı deputat.
Sarymnyŋ aituynşa, ol mūndai mümkındıkke özı de qalaidy.
«Būl Qazaqstan üşın naǧyz top oqiǧa bolar edı. Qan tögıstı toqtatu… Sonymen bırge būl prezidenttıŋ diplomatiialyq mansabyndaǧy ülken beles bolar edı. Degenmen beibıtşılıkke jetu prosesı ondaǧan jyldarǧa sozyluy yqtimal», — dedı ol.
Jurnalist sūraǧyna jauap bere otyryp, Qazaqstanda kelıssözder ötkızuge alǧyşarttar bar ma degende, Sarym:
«Bız Tramptan belgı kördık. Ol jaqyn uaqytta bızdıŋ aimaqqa kelmekşı. Al Qazaqstan adal deldal, adal broker bolǧandyqtan, nege bolmasqa?» — dedı.
«Taǧy bır maŋyzdy jait: Qazaqstan Resei prezidentı Vladimir Putin üşın de, Tramp üşın de qolaily el. Bız olardyŋ qauıpsızdıgın de, basqa qajettılıkterın de tolyq qamtamasyz ete alamyz», — dep tüiındedı Aidos Sarym.
Eske salaiyq, qaŋtardyŋ basynda Qazaqstan prezidentı Qasym-Jomart Toqaev «Ana tılı» gazetıne bergen sūhbatynda Ukrainadaǧy jaǧdaidy Donald Tramppen telefon arqyly talqylaǧanyn aitqan. Ol Astananyŋ Ukraina boiynşa kelıssözderdıŋ bastaluyn qoldaitynyn, bıraq deldaldyqqa ūmtylmai, Qazaqstannyŋ äleuetı men mümkındıgıne sai äreket etetının atap ötken. Sondai-aq Toqaev respublika «ärqaşan halyqaralyq mäselelerdı şeşuge kömektesuge daiyn» ekenın jetkızgen.
