Almatyda şahmattan kadetter (balalar) arasyndaǧy Älem chempionaty bastaldy. 2025 jylǧy 19–30 qyrküiek aralyǧynda ötetın turnirde U8, U10 jäne U12 jas sanattaryndaǧy balalar baq synaidy. Būl turaly Qazaqstan şahmat federasiiasy jazdy, dep habarlaidy "Adyrna".
Chempionatqa 88 elden 850-den astam jas şahmatşy tırkelgen. Qazaqstan chempionat iesı retınde 200-den astam oiynşy şyǧarǧan. Ündıstan (28), Qytai (25) jäne AQŞ (24) syndy şahmat derjavalarynan da qatysuşylar bar.
FİDE prezidentı Arkadii Dvorkovichtıŋ aituynşa, Qazaqstandaǧy turnir özındık rekord ornatyp tūr.
«Kadetter arasyndaǧy turnir jyl saiyn ötkızıledı. Qazaqstandaǧy turnirdıŋ basty erekşelıgı qatysuşy memleketterdıŋ sany bolyp otyr. 88 eldıŋ Federasiiasy öz deligasiiasyn jıberıp otyr. Qazaqstannyŋ özınen ǧana 200-den astam bala tırkelgen. Būl eldegı şahmattyŋ damuy deŋgeiın, onyŋ bolaşaǧy jarqyn ekenın anyq körsetedı. Būl tūrǧydan alǧanda, basqa elder Qazaqstannan ülgı aluy tiıs», – dedı Arkadii Dvorkovich.
Qazaqstan şahmat Federasiiasynyŋ prezidentı Timur Turlovtyŋ aituynşa, turnirdıŋ Qazaqstanda ötuı bızdıŋ jas sportşylar üşın jäne jalpy Qazaqstan şahmat mektebı üşın asa maŋyzdy. Sebebı älemdegı üzdık sportşylarmen oinau bızdıŋ kadetterge jaqsy täjıribe bolmaq.
«Eşbır şahmat turnirı, tıptı elımızdegı özge sporttyq şaralardyŋ eşqaisysy da mūndai auqymdy qatysuşylar qūramyn jinamaǧan. Būl – qazaqstandyq şahmat pen tūtas elımız üşın tarihi sät. Bız qonaqtardy tek qonaqjai retınde ǧana emes, sonymen qatar älemnıŋ eŋ myqty şahmat derjavalarynyŋ bırı ärı turnirdıŋ basty favoritı märtebesınde qarsy alyp otyrmyz», – dedı Timur Turlov.
Turnirdıŋ basty favoritterınıŋ bırı qazaqstandyq sportşy Dias Quandyqūly turnirdıŋ Qazaqstanda ötıp jatqanyna quanyşty ekenın aitady. Ol 2023 jyly däl osy turnirde 10 jasqa deiıngı balalar arasynda älem chempiony bolǧan. Biyl 12 jasqa deiıngı şahmatşylar qatarynda öner körsetedı.
«Turnirde jaqsy öner körsetuge tyrysamyn. Baq şaba ma, bap şaba ma köremız. Bärı sportşylardyŋ daiyndyǧyna bailanysty ǧoi. Mūndaǧy köptegen sportşylarmen būryn kezdesıp, oinap körgenmın. Üzdık oiynşylar jinaldy dep senımdı türde aita alamyn. Jaqsy oiyn körsetuge barymdy salatyn bolamyn», – dedı Dias Quandyqūly.
Būǧan deiın Qazaqstanda şahmattan eŋ joǧary deŋgeidegı halyqaralyq jarystardyŋ, sonyŋ ışınde älem chempionattary men erler arasyndaǧy älem chempiony ataǧy üşın match ta ötkızıldı.
2024 jyly İtaliianyŋ Montesilvano qalasynda ötken Älem chempionatyna 77 elden 700-den astam jas şahmatşy qatysqan.
Aşylu räsımınen keiın bırden 1-şı tur bastaldy. Jalpy 19–30 qyrküiek aralyǧynda şveisar jüiesı boiynşa 11 tur ötedı. Uaqytty baqylau – 90+30 formaty (är partiiaǧa 90 minut jäne alǧaşqy jürısten bastap är qadamǧa 30 sekund qosylady).
11 turdyŋ qorytyndysy boiynşa älem chempiondary, kümıs jäne qola jüldegerler anyqtalady. Jarys ūldar (Open) men qyzdar (Girls) arasynda alty jas sanatynda ötıp jatyr: O8, G8, O10, G10, O12 jäne G12.
